Paritala Sunitha: ప్రజల సమస్యలు తెలుసుకోండి.. పార్టీ శ్రేణులకు పరిటాల సునీత దిశానిర్దేశం

రాష్ట్రంలో కూటమి ప్రభుత్వం ఏర్పడి ఏడాది పూర్తయిన నేపథ్యంలో, ప్రజల నుంచి నేరుగా అభిప్రాయాలు సేకరించేందుకు తెలుగుదేశం పార్టీ కొత్త కార్యక్రమానికి శ్రీకారం చుట్టింది. ‘సుపరిపాలనకు తొలి అడుగు’ పేరిట చేపట్టిన ఈ కార్యక్రమంలో భాగంగా పార్టీ నేతలు, కార్యకర్తలు ఇంటింటికీ వెళ్లనున్నారు. ఈ సందర్భంగా మాజీ మంత్రి పరిటాల సునీత క్షేత్రస్థాయిలో పర్యటించి, ఈ కార్యక్రమ ఉద్దేశాలను వివరించి పార్టీ శ్రేణులకు దిశానిర్దేశం చేశారు.

ముఖ్యమంత్రి చంద్రబాబు ఆదేశాల మేరకు మంత్రులు, ఎమ్మెల్యేలు, పార్టీ బాధ్యులు సహా క్షేత్రస్థాయి కార్యకర్తల వరకు ప్రతి ఒక్కరూ ఈ కార్యక్రమంలో పాల్గొనాలని పరిటాల సునీత స్పష్టం చేశారు. కేవలం ఫొటోలు దిగి వెళ్లకుండా, ప్రతి కుటుంబంతో కనీసం 15 నిమిషాలు కూర్చుని వారి సమస్యలను అడిగి తెలుసుకోవాలని సూచించారు. ప్రభుత్వ పాలన ఎలా ఉంది, ఏమైనా ఇబ్బందులు ఎదుర్కొంటున్నారా అనే విషయాలను నమోదు చేసుకోవాలని ఆమె కోరారు.

తన పర్యటనలో కొందరు రేషన్ కార్డులు, పింఛన్లు అందలేదని, మరికొందరు గృహ నిర్మాణ సమస్యలను తన దృష్టికి తెచ్చారని సునీత తెలిపారు. ప్రజలు చెప్పిన ప్రతి సమస్యను నమోదు చేసుకుని, రానున్న నాలుగేళ్లలో వాటన్నింటినీ పరిష్కరిస్తామని వారికి భరోసా ఇవ్వాలని కార్యకర్తలకు ఆమె పిలుపునిచ్చారు. ఎన్నికల ముందు ఇచ్చిన 'సూపర్ సిక్స్' హామీలను తప్పకుండా నెరవేరుస్తామని ప్రజలకు గుర్తుచేయాలని అన్నారు. ఏడాది కాలంలో తమ ప్రభుత్వం పెంచిన పింఛన్లు, 'తల్లికి వందనం', ఉచిత గ్యాస్ సిలిండర్లు వంటి పథకాల ద్వారా ప్రజలకు చేకూరిన లబ్ధిని కూడా వివరించాలని ఆమె సూచించారు.