aamir khan: టర్కీ వీధుల్లో ఆమిర్ ఖాన్‌ను ఆట‌ప‌ట్టించిన ఐస్‌క్రీం విక్ర‌య‌దారుడు... వీడియో చూడండి
- ఆశ్చ‌ర్య‌పోయిన మిస్ట‌ర్ పర్ఫెక్షనిస్ట్
- టర్కీ వీధుల్లో ఆమిర్ విహారం
- ట్వీట్ చేసిన హీరో
ఐస్‌క్రీం చూడ‌గానే ఎవ‌రికైనా నోరూరుతుంది. టర్కీ వీధుల్లో విహ‌రిస్తున్న‌పుడు ప‌క్క‌నే ఉన్న ఐస్‌క్రీం స్టాల్‌ని చూడ‌గానే బాలీవుడ్ మిస్ట‌ర్ పర్ఫెక్షనిస్ట్ ఆమిర్ ఖాన్‌కి అలాగే నోరూరింది. అక్క‌డికి వెళ్లి ఐస్‌క్రీం ఇమ్మ‌ని అడిగాడు. కానీ ఆ ఐస్‌క్రీం విక్ర‌య‌దారుడు ఆమిర్‌ను కాసేపు ఆట‌ప‌ట్టించాడు. ఐస్‌క్రీం ఇచ్చీఇవ్వ‌న‌ట్టుగా, ఒక‌సారి ఇచ్చి, మ‌రోసారి లాక్కొని ఇలా ర‌క‌ర‌కాల విన్యాసాలు ప్ర‌ద‌ర్శించాడు. ఒక నిమిషం పాటు నానా ఇబ్బంది పెట్టి చివ‌రికి ఆమిర్‌కి ఐస్‌క్రీంని రుచి చూపించాడు.
ఆ ఐస్‌క్రీం విక్ర‌య‌దారుడి విన్యాసాల‌కు ఆశ్చ‌ర్య‌పోయిన ఆమిర్...`క‌ష్ట‌ప‌డి సాధించింది చాలా తియ్య‌గా ఉంటుంది. టర్కీ ఐస్‌క్రీం చాలా బాగుంది` అంటూ ఆ విన్యాసాల వీడియోను త‌న ట్విట్ట‌ర్ ఖాతాలో పోస్ట్ చేశాడు. ఐస్‌క్రీం కొన‌డానికి వ‌చ్చిన వారిని ఆట‌ప‌ట్టిస్తూ, వారి ఓపిక‌ను ప‌రీక్షించే ఇలాంటి వీడియోలు సోష‌ల్ మీడియాలో చాలానే ఉన్నాయి. కానీ అదే అనుభ‌వం మ‌న హీరోకి జరిగిన‌పుడు చూస్తుంటే భ‌లే ముచ్చ‌టేస్తోంది.