baaghi-2: ఏక్, దో, తీన్, అంటూ వచ్చేసిన మోహినీ... వైరల్ వీడియో
- 2016లో వచ్చిన ‘బాఘి’ సినిమాకు ఇది సీక్వెల్‌ గా ‘బాఘి 2’
- మార్చి 30న విడుదల కానున్న ‘బాఘి 2’
- ‘తేజాబ్‌’ సినిమాలో మాధురీ దీక్షిత్ ‘ఏక్ దో తీన్..’ రీమిక్స్ లో జాక్వెలిన్ ఫెర్నాండెజ్
1990ల్లో దేశం మొత్తాన్ని ఒక ఊపు ఊపేసిన ‘తేజాబ్‌’ సినిమాలో మాధురీ దీక్షిత్ ఆడిపాడిన ‘ఏక్ దో తీన్..’ పాట గుర్తుందా? ఆ పాటకు రీమిక్స్ వెర్షన్ వచ్చేసింది. బాలీవుడ్ రియల్ లైఫ్ హాట్ కపుల్ టైగర్‌ ష్రాఫ్‌, దిశా పటానీ జంటగా నటిస్తున్న ‘బాఘి 2’ సినిమాలో ఈ పాటను దర్శకుడు, కొరియోగ్రాఫర్ అహ్మద్ ఖాన్ పెట్టాడు. 2016లో వచ్చిన ‘బాఘి’ సినిమాకు ఇది సీక్వెల్‌ గా రూపొందుతోంది. ఈ సినిమా మార్చి 30న విడుదల కానుంది. కాగా, ఈ పాటలో మోహినీగా జాక్వెలిన్ ఫెర్నాండెజ్ నర్తించింది. మాధురీ పాటను ప్రముఖ గాయని అల్కా యాగ్నిక్‌ పాడగా, రీమిక్స్ పాటను శ్రేయా ఘోషల్‌ పాడింది.
స్వతహాగా కొరియోగ్రాఫరైన అహ్మద్ ఖాన్ పాత పాటతో ఈ పాటను పోల్చకుండా వుండేందుకు చాలా జాగ్రత్తలు తీసుకున్నాడు. ఒకే ఒక్క స్టెప్పు మినహా మిగిలినవన్నీ కొత్త స్టెప్పులను కంపోజ్‌ చేయడం విశేషం. ఈ పాటను సోషల్ మీడియాలో విడుదల చేయగా, వైరల్ అవుతోంది. దీనిపై జాక్వెలిన్ మాట్లాడుతూ, ‘మాధురి డ్యాన్స్‌ చేసినంత గొప్పగా ఎవ్వరూ చేయలేరని చెప్పింది. ఈ పాటకు తనను ఎంచుకున్నప్పుడు ‘చేయగలనా’ అని భయపడ్డానని, అయితే స్టెప్పుల విషయంలో పోలిక ఉండదని తెలియడంతో ఊపిరి పీల్చుకున్నానని తెలిపింది. కాగా, మాధురి పాట ఏడు నిమిషాల నిడివి ఉండగా, జాక్వెలిన్ పాట రెండు నిమిషాల నిడివి కూడా లేకపోవడం విశేషం.