metro: రెండు నెలల్లో ఎల్బీనగర్‌లోనూ పట్టాలెక్కనున్న మెట్రో రైలు.. కేటీఆర్ ప్రకటన!
- వివరించిన కేటీఆర్
- నాగోల్‌ వరకు కూడా ఈ మార్గాన్ని కలుపుతాం
- భవిష్యత్తులో విమానాశ్రయం వరకు పొడిగింపు
తెలంగాణ ముఖ్యమంత్రి కేసీఆర్‌ చేతుల మీదుగా రెండు నెలల్లో ఎల్బీనగర్‌ మార్గంలోనూ మెట్రో రైల్‌ ప్రారంభమవుతుందని మంత్రి కేటీఆర్ తెలిపారు. అలాగే, ఎల్బీనగర్‌ నుంచి నాగోల్‌ వరకు కూడా ఈ మార్గాన్ని కలుపుతామని చెప్పారు. భవిష్యత్తులో ఫలక్‌నుమా మీదుగా హైదరాబాద్‌ విమానాశ్రయం వరకు పొడిగిస్తామని తెలిపారు. కొందరు రాష్ట్ర మంత్రులు, ఎమ్మెల్యేలతో కలిసి ఈ రోజు ఎల్బీనగర్‌లోని చింతల్‌కుంట అండర్ పాస్‌ను కేటీఆర్ ప్రారంభించారు.
ఎల్బీనగర్‌లో ఎడమ వైపు చేపట్టిన అండర్ పాస్‌ ఈ ఏడాది డిసెంబర్ నాటికి పూర్తి చేయనున్నారు. ఈ సందర్భంగా కేటీఆర్ మీడియాతో మాట్లాడుతూ... హైదరాబాద్‌లో ట్రాఫిక్ సమస్యలకు చెక్‌ చెప్పేందుకు పెద్ద ఎత్తున పనులు చేపట్టామని చెప్పారు. మూసీపై ఎక్స్‌ప్రెస్‌ వే నిర్మిస్తామని తెలిపారు. హైదరాబాద్‌లో ఉన్న 185 చెరువుల్లో మొదటిదశలో 40 చెరువులను ఉపయోగకరంగా తీర్చిదిద్దుతామని అన్నారు.