trailer: అచ్చం అబ్బాయిలా హీరోయిన్‌.. అమ్మాయిలా హీరో.. ‘జంబ లకిడి పంబ’ ట్రైలర్‌ విడుదల
- శ్రీనివాస్ రెడ్డి, సిద్ధి ఇద్నాని జంటగా సినిమా
- అలరిస్తోన్న డైలాగులు
- ఈ నెల 22న విడుదల
శ్రీనివాస్ రెడ్డి, సిద్ధి ఇద్నాని జంటగా మురళీకృష్ణ దర్శకత్వంలో రూపుదిద్దుకుంటోన్న 'జంబ లకిడి పంబ' సినిమా ట్రైలర్‌ ఈరోజు విడుదలైంది. గతంలో వచ్చిన ‘జంబ లకిడి పంబ’ సినిమా ప్రేక్షకులను కడుపుబ్బా నవ్వించింది. ఇప్పుడు అదే టైటిల్‌తో, అటువంటి కథాంశంతో ఈ సినిమాను రూపొందించారు. ఇందులో హీరో శ్రీనివాసరెడ్డి పలు సీన్లలో అమ్మాయిలా ప్రవర్తిస్తున్నాడు. ‘అసలు ఈ మగాళ్ల బాడీలో ఉండటం ఎంత నరకమో తెలుసా’ అని అంటున్నాడు.
హీరోయిన్‌ సిద్ధి ఇద్నాని అబ్బాయిలా దుస్తులు వేసుకుని గంభీరంగా కనపడుతూ అలరిస్తోంది. ‘రాత్రి ఓ మేటర్‌ జరిగిందిలే’ అంటూ ఓ డైలాగ్ వదిలింది. గోపీ సుందర్‌ సంగీతం అందిస్తోన్న ఈ సినిమా ట్రైలర్‌ ప్రేక్షకుల్లో ఆసక్తి పెంచుతోంది. ఈ సినిమాలో పోసాని కృష్ణ‌ముర‌ళి, వెన్నెల కిశోర్ కీల‌క పాత్ర‌ల్లో నటిస్తున్నారు. ర‌వి, జోస్‌, ఎన్‌ శ్రీనివాసరెడ్డి ఈ సినిమా నిర్మిస్తున్నారు. ఈ నెల 22వ తేదీన ఈ సినిమాను విడుదల చేయనున్నారు.