Ponnam Prabhakar: టీఆర్ఎస్ గ్రాఫ్ పడిపోతోంది: కాంగ్రెస్ నేత పొన్నం ప్రభాకర్
- కేసీఆర్ నియంతృత్వ ధోరణితో వ్యవహరించారు
- కొన్ని నియోజకవర్గాల్లో నిరసనలు తలెత్తాయి
- ఇప్పటికే 40 మంది అభ్యర్థులను మా అధిష్ఠానం ఖరారు చేసింది
తెలంగాణలో టీఆర్ఎస్ గ్రాఫ్ క్రమేపీ పడిపోతోందని టీ-కాంగ్రెస్ సీనియర్ నేత పొన్నం ప్రభాకర్ విమర్శించారు. ఈ రోజు ఆయన విలేకరులతో మాట్లాడుతూ, టీఆర్ఎస్ తమ అభ్యర్థులను ముందుగానే ప్రకటించినప్పటికీ చాలా చోట్ల అసమ్మతి సెగలు మొదలయ్యాయని, అభ్యర్థుల ఎంపికకు సంబంధించి ఏ రాజకీయ పార్టీ అయినా ఎన్నికల కమిటీ ఏర్పాటు చేస్తుందని, టీఆర్ఎస్ లో మాత్రం అలాంటిదేమీ జరగలేదని విమర్శించారు.
కేసీఆర్ నియంతృత్వ ధోరణితో వ్యవహరించారని, దాని ఫలితంగానే ఈ రోజున కొన్ని నియోజకవర్గాల్లో నిరసన ప్రదర్శనలు జరుగుతున్నాయని అన్నారు. తమ పార్టీ విషయానికి వస్తే, అధికారంలోకి వచ్చే విధంగా తమ పార్టీ అభ్యర్థుల ఎంపిక ఉంటుందని, ఇప్పటికే 40 మంది అభ్యర్థులను తమ అధిష్ఠానం ఖరారు చేసిందని పొన్నం చెప్పారు.