USA: అమెరికాలో ఉన్మాది ఘాతుకం.. పోలీస్ అధికారిని బలితీసుకున్న దుండగుడు!
- చిన్నారులను బందీగా చేసుకున్న షూటర్
- ఘటనాస్థలానికి చేరుకున్న పోలీసులు
- విచక్షణారహితంగా కాల్పులు జరిపిన దుండగుడు
అమెరికాలోని దక్షిణ కరోలినా కాల్పుల మోతతో దద్దరిల్లింది. ఓ దుండగుడు పోలీసులే లక్ష్యంగా ఇష్టానుసారం కాల్పులు జరిపాడు. ఈ ఘటనలో ఐదుగురు పోలీస్ అధికారులు తీవ్రంగా గాయపడ్డారు. వీరిని హుటాహుటిన ఆసుపత్రికి తరలించగా, ఓ అధికారి చికిత్స పొందుతూ ప్రాణాలు కోల్పోయాడు. ఫ్లోరెన్స్ కౌంటీ పరిధిలోని మిర్టల్ తీరంలో చోటుచేసుకున్న ఘటనతో స్థానిక ప్రజలు ఒక్కసారిగా ఉలిక్కి పడ్డారు.
స్థానిక కాలమానం ప్రకారం బుధవారం ఓ ఇంట్లోకి ప్రవేశించిన దుండగుడు చిన్నారులను బందీలుగా చేసుకున్నాడు. దీంతో ఘటనాస్థలానికి పోలీసులు వెంటనే చేరుకున్నారు. అధికారులను గమనించిన నిందితుడు ఇష్టానుసారం కాల్పులు జరపడం ప్రారంభించాడు. ఈ ఘటనలో ఐదుగురు అధికారులు తీవ్రంగా గాయపడగా, వారిలో ఒకరు ప్రాణాలు కోల్పోయారు.
చివరికి రెండు గంటల పాటు ఆపరేషన్ నిర్వహించి నిందితుడిని పోలీసులు అదుపులోకి తీసుకోగలిగారు. అయితే ఈ దాడికి గల కారణం ఇంకా తెలియరాలేదు. మరోవైపు ఈ ఘటనలో ప్రాణాలు కోల్పోయిన పోలీస్ అధికారికి అమెరికా అధ్యక్షుడు డొనాల్డ్ ట్రంప్ నివాళులు అర్పించారు. పోలీస్ అధికారులకు అమెరికా ప్రజలు జీవితాంతం రుణపడి ఉంటారని వ్యాఖ్యానించారు.
