Uttarakhand: ఉద్యోగం ఇప్పిస్తానని మహిళా కార్యకర్తను రేప్ చేసిన బీజేపీ నేత!
- ఉత్తరాఖండ్ లోని డెహ్రాడూన్ లో ఘటన
- బీజేపీ రాష్ట్ర ప్రధాన కార్యదర్శి సంజయ్ నిర్వాకం
- కొరడా ఝుళిపించిన బీజేపీ అధిష్ఠానం
ఉద్యోగం ఇప్పిస్తానని నమ్మబలికిన ఓ రాజకీయ నేత సొంత పార్టీకి చెందిన మహిళా కార్యకర్తపై అత్యాచారం చేశాడు. ఈ దారుణ ఘటన ఉత్తరాఖండ్ లోని డెహ్రాడూన్ లో చోటుచేసుకుంది. దీంతో అతనిపై ఆగ్రహించిన పార్టీ యాజమాన్యం బాధ్యతల నుంచి తప్పిస్తూ ఉత్తర్వులు జారీచేసింది.
ఉత్తరాఖండ్ రాష్ట్ర ప్రధాన కార్యదర్శి సంజయ్ కుమార్ తనపై అత్యాచారం చేశాడని ఓ యువతి పోలీసులను ఆశ్రయించింది. ఉద్యోగం ఇప్పిస్తానని నమ్మబలికి ఇక్కడి బల్బీర్ రోడ్డులోని పార్టీ కేంద్ర కార్యాలయంలోనే తనపై లైంగికదాడి చేశాడని వాపోయింది.
ఈ ఘటన మీడియాలో రావడంతో సంజయ్ ను పార్టీ బాధ్యతల నుంచి తప్పిస్తున్నట్లు బీజేపీ ప్రకటించింది. ఈ సందర్భంగా తనకు న్యాయం చేయాలంటూ బాధితురాలు ఆందోళనకు దిగింది. మరోవైపు బాధితురాలి ఫిర్యాదు ఆధారంగా కేసు నమోదుచేసిన పోలీసులు దర్యాప్తు చేస్తున్నారు.
