Chennai: చెన్నై నడిబొడ్డున దారుణ హత్య.. అందరూ చూస్తుండగానే కత్తులతో యువకుడి నరికివేత
- అరుంబాక్కంలో పట్టపగలే ఘటన
- వెంటాడి మరీ చంపిన దుండగులు
- భయభ్రాంతులకు గురైన జనం
చెన్నైలో కొందరు యువకులు పట్టపగలే దారుణానికి తెగబడ్డారు. రద్దీ రోడ్డుపై అందరూ చూస్తుండగానే ఓ యువకుడిని అత్యంత దారుణంగా నరికి చంపారు. కళ్లముందే జరుగుతున్న ఈ భయానక దృశ్యాన్ని అడ్డుకున్న ప్రయత్నం కానీ, పోలీసులకు సమాచారం ఇచ్చే సాహసం కానీ ఒక్కరు కూడా చేయకపోవడం గమనార్హం.
అరుంబాక్కం ప్రాంతంలోని డీజీ వైష్ణవ కాలేజీ సమీపంలో బైక్‌పై వచ్చిన ముగ్గురు యువకులు ఓ వ్యక్తిని వెంటాడి వేటాడారు. యువకుడు భయంతో పరుగులు తీస్తుంటే వెంటాడి మరీ కత్తులతో నరికి చంపారు. ఈ ఘటనను కొందరు వీడియోలు తీయగా, మరికొందరు భయంతో పరుగులు తీశారు. సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని పోస్టుమార్టం కోసం తరలించారు. అక్కడి సీసీటీవీ ఫుటేజీ ఆధారంగా నిందితుల కోసం గాలిస్తున్నారు.
