India: భారత జెండాను ప్రదర్శించిన పాక్ స్కూలు... కఠిన నిర్ణయం తీసుకున్న అధికారులు!
- కరాచీలో బేబీకేర్ కేంబ్రిడ్జ్ స్కూల్
- భారత పాటకు చిన్నారుల నృత్యం
- రిజిస్ట్రేషన్ రద్దు చేసిన అధికారులు
ఓ సాంస్కృతిక కార్యక్రమంలో భాగంగా భారత జెండాను ప్రదర్శించినందుకు పాకిస్థాన్ లోని పాఠశాలపై అధికారులు కఠిన చర్యలు తీసుకున్నారు. కరాచీ నగరంలోని మామా బేబీకేర్ కేంబ్రిడ్జ్ స్కూల్ లో ఇటీవల ఓ ఈవెంట్ జరిగింది. ఇందులో కొందరు చిన్నారులు, మూడు రంగుల పతాకాన్ని రెపరెపలాడిస్తూ భారతీయ పాటకు నృత్యం చేశారు.
ఈ కార్యక్రమం వీడియో వైరల్ కావడంతో, సింధ్‌ ప్రైవేట్‌ సంస్థల రిజిస్ట్రేషన్, తనిఖీల డైరెక్టరేట్‌ అధికారులు సీరియస్ అయ్యారు. ఈ పాఠశాల ఉద్దేశపూర్వకంగానే ఈ కార్యక్రమాన్ని ఏర్పాటు చేసినట్లు దర్యాప్తులో తేలిందంటూ, స్కూల్ రిజిస్ట్రేషన్ ను రద్దు చేశారు. విద్యాసంస్థల్లో ఇండియా సంస్కృతికి ప్రచారం చేయడం పాక్ జాతీయ గౌరవానికి విరుద్ధమని ఈ సందర్భంగా అధికారులు తెలిపారు.
ఘటనపై స్కూల్ వైస్‌ ప్రిన్సిపాల్‌ స్పందిస్తూ, ఇతర దేశాల సంస్కృతి సంప్రదాయాలపై అవగాహన కోసమే ఇలా చేశామని, ఇండియాతో పాటు సౌదీ అరేబియా, అమెరికా, ఈజిప్టు, తదితర దేశాల సంప్రదాయాలపైనా ప్రదర్శనలు చేశామని అన్నారు.