Pawan Kalyan: అభిమాని ఘనకార్యానికి కింద పడిపోయిన పవన్ కల్యాణ్!
- వెనుక నుంచి వచ్చి గట్టిగా కాళ్లు పట్టుకున్న అభిమాని
- బ్యాలెన్స్ తప్పి పడిపోయిన పవన్
- వెంటనే స్పందించిన భద్రతా సిబ్బంది
అభిమానులు అత్యుత్సాహం ప్రదర్శించడం ఒక్కోసారి రాజకీయనేతలకు ఇబ్బందికరంగా మారుతుంది. తాజాగా, జనసేన పార్టీ చీఫ్ పవన్ కల్యాణ్ కు అలాంటి పరిస్థితే ఎదురైంది. విజయనగరంలో నేడు జనసేన పార్టీ భారీ బహిరంగ సభ నిర్వహించింది. ఈ సభకు హాజరైన పవన్ కల్యాణ్ ప్రసంగించేందుకు సన్నద్ధమవుతుండగా ఊహించని ఘటన చోటుచేసుకుంది. వెనుక నుంచి వచ్చిన ఓ అభిమాని దూకుడు ప్రదర్శించడంతో పవన్ కిందపడిపోయారు.
ఆ వ్యక్తి పవన్ కు పాదాభివందనం చేసే క్రమంలో వెనుక నుంచి కాళ్లను గట్టిగా పట్టుకోవడంతో పవన్ బ్యాలన్స్ ఆపుకోలేకపోయాడు. ఒక్కుదుటున కిందపడిపోయాడు. ఈ ఘటనతో పవన్ తత్తరపాటుకు గురైనట్టు విజువల్స్ చూస్తే అర్థమవుతుంది. ఈ ఘటనలో మైక్ కూడా విరిగిపోయింది. భద్రతా సిబ్బంది వెంటనే స్పందించి పవన్ పడిపోవడానికి కారణమైన అభిమానిని ఇవతలికి లాగి పోలీసులకు అప్పగించారు. అనంతరం పవన్ తన ప్రసంగం మొదలుపెట్టారు.
