Lagadapati: లగడపాటీ.. మీ పేరును నారా రాజగోపాల్‌గా మార్చుకోండి: వైసీపీ నేత విజయసాయి ఫైర్
- ఏపీ ప్రజలు సైకిలెక్కారన్న లగడపాటి
- చంద్రబాబు డ్రామాలో భాగమన్న విజయసాయి
- లగడపాటిని ఆంధ్రా జలగ అంటూ తీవ్ర విమర్శలు
ఆంధ్రప్రదేశ్ ప్రజలు మరోసారి టీడీపీకి పట్టం కట్టబోతున్నారంటూ శనివారం హింట్ ఇచ్చిన మాజీ ఎంపీ లగడపాటి రాజగోపాల్‌పై వైసీపీ నేతలు విమర్శలతో దాడి చేస్తున్నారు. లగడపాటి ఆంధ్రా ఆక్టోపస్ కాదని, ఆంధ్రా జలగ అని వైసీపీ ఎంపీ విజయసాయి తీవ్ర వ్యాఖ్యలు చేశారు. చంద్రబాబునాయుడి స్కెచ్‌లో భాగంగానే లగడపాటి ఈ పలుకులు వల్లిస్తున్నారని దుయ్యబట్టారు. ఈ ఎన్నికల్లో గెలుపు తమదేనని ధీమా వ్యక్తం చేశారు.
తమ ఓటమిని ఈవీఎంలపై నెట్టేందుకే చంద్రబాబు ఇలా లగడపాటితో చెప్పిస్తున్నారని విజయసాయి అన్నారు. లగడపాటి చెప్పినా ఓడిపోతున్నామంటే అందుకు ఈవీఎం ట్యాంపరింగే కారణమని చెప్పేందుకే ఈ గోలంతా అని ఎద్దేవా చేశారు. లగడపాటి తన పేరును నారా రాజగోపాల్‌గా మార్చుకోవాలని సూచిస్తూ ట్వీట్ చేశారు.
శనివారం విజయవాడలో విలేకరులతో మాట్లాడిన లగడపాటి తన వ్యక్తిగత అభిప్రాయమంటూ కొన్ని ఆసక్తికర విషయాలు చెప్పారు. ఏపీలో హంగ్ రాబోదని, ప్రజలు సైకిల్ ఎక్కేందుకే మొగ్గు చూపారంటూ పరోక్షంగా టీడీపీ విజయం సాధించబోతోందని చెప్పుకొచ్చారు. అలాగే, పవన్ అసెంబ్లీలో అడుగుపెట్టబోతున్నారని లగడపాటి జోస్యం చెప్పారు.
