Chandrayaan 2: చంద్రయాన్ 2: నింగిలోకి దూసుకెళ్లిన జీఎస్ఎల్వీ

22-07-2019 Mon 14:43 | Technology

నిప్పులు చిమ్ముతూ నింగికెగసిన జీఎస్ఎల్వీ
ప్రపంచ అంతరిక్ష రంగంలో సత్తా చాటిన ఇస్రో
ఆనందంలో మునిగితేలుతున్న యావత్ భారతదేశం

అంతరిక్ష పరిశోధనల రంగంలో భారత్ సత్తాను చాటింది. అగ్రదేశాలకు దీటుగా జాబిల్లిపై ఏముందో శోధించే క్రమంలో మరో అడుగు వేసింది. భారత అంతరిక్ష పరిశోధన సంస్థ (ఇస్రో) ప్రతిష్టాత్మకంగా చేపట్టిన చంద్రయన్-2 ప్రయోగం జరిగింది. షార్ అంతరిక్ష కేంద్రంలోని రెండో లాంచ్ ప్యాడ్ నుంచి జీఎస్ఎల్వీ మార్చ్3ఎం1 వాహకనౌక నిప్పులు చిమ్ముతూ నింగికెగసింది. మధ్యాహ్నం 2.43 నిమిషాలకు ఇది నింగిలోకి దూసుకెళ్లింది. ఈ ప్రయోగంతో యావత్ దేశం ఆనందంలో మునిగిపోయింది.

ఈ ప్రయోగం ద్వారా జీఎస్ఎల్వీ ఆర్బిటర్, ల్యాండర్, రోవర్ లను తనతో పాటు తీసుకెళ్లింది. రాకెట్ బరువు 640 టన్నులు. 3,877 కిలోల బరువు కలిగిన చంద్రయాన్- కాంపోజిట్ మాడ్యూల్ తో రాకెట్ పయనిస్తోంది. భూమికి 181 కిలోమీటర్ల ఎత్తులో చంద్రయాన్-2 మాడ్యూల్ విడిపోతుంది.

ఈ ప్రయోగానికి రూ. 978 కోట్లు ఖర్చయింది. ఇస్రో చేపట్టిన ఈ ప్రయోగాన్ని యావత్ ప్రపంచం ఆసక్తికరంగా పరిశీలిస్తోంది.