Polavaram: పోలవరం రివర్స్ టెండరింగ్ కు నోటిఫికేషన్ విడుదల

17-08-2019 Sat 21:18 | Andhra

రూ.4,987 కోట్ల విలువైన పనులకు నోటిఫికేషన్ జారీ
నిపుణుల కమిటీ నివేదిక ఆధారంగా నోటిఫికేషన్
సోమవారం నుంచి వెబ్ సైట్ లో అందుబాటులో ఉండనున్న నోటిఫికేషన్

ఏపీలో వైసీపీ అధికారం చేపట్టాక పోలవరం ప్రాజక్టు పాత టెండర్లను రద్దు చేయడం తెలిసిందే. పోలవరం నిర్మాణ పనులకు రివర్స్ టెండరింగ్ లో బిడ్లను కోరాలని జగన్ ప్రభుత్వం నిర్ణయించగా, ఈ మేరకు అధికారికంగా నోటిఫికేషన్ విడుదలైంది. మొత్తం రూ.4,987 కోట్ల విలువైన పనులకు ఈ నోటిఫికేషన్ ద్వారా టెండర్లను ఆహ్వానిస్తున్నారు. నిపుణుల కమిటీ నివేదిక ఆధారంగా రివర్స్ టెండరింగ్ నోటిఫికేషన్ జారీ చేశారు. తాజా అంచనాల నేపథ్యంలో పోలవరం పనుల్లో రూ.3,600 కోట్ల మేర పెంపుదల చోటుచేసుకుందని కమిటీ పేర్కొంది.

ఈ రివర్స్ టెండరింగ్ లో భాగంగా పోలవరం హెడ్ వర్క్స్ కు రూ.1,887 కోట్లతో, పవర్ హౌస్ నిర్మాణానికి రూ.3,100 కోట్లతో బిడ్లను కోరుతున్నట్టు రివర్స్ టెండరింగ్ నోటిఫికేషన్ లో పేర్కొన్నారు. ఈ నోటిఫికేషన్ లో ఇనీషియల్ బెంచ్ మార్క్ కింద రూ.4,900 కోట్లుగా నిర్ణయించారు. ఈ మేరకు పూర్తి నోటిఫికేషన్ ను ఈ-టెండరింగ్ వెబ్ సైట్ లో అప్ లోడ్ చేస్తున్నారు. సోమవారం నుంచి వెబ్ సైట్ లో నోటిఫికేషన్ దర్శనమివ్వనుంది.