Woman: మహిళా రోగికి మత్తు ఇంజెక్షన్ ఇచ్చి అత్యాచారం చేసిన డాక్టర్!
- పైల్స్ సమస్యతో ఆసుపత్రికి వచ్చిన మహిళ
- మత్తులో ఉన్న ఆమెపై అత్యాచారం చేసి.. వీడియో తీసిన వైనం
- ఆ తర్వాత శారీరక సంబంధం పెట్టుకోవాలంటూ ఒత్తిడి
చికిత్స కోసం తన వద్దకు వచ్చిన మహిళా రోగిపై ఓ డాక్టర్ పాశవికంగా అత్యాచారం జరపడం కలకలం రేపుతోంది. ఈ దారుణ ఘటన ముంబైలో చోటు చేసుకుంది. ముంబైలోని జోగేశ్వరి ఈస్ట్ ప్రాంతానికి చెందిన ఓ మహిళ (27) పైల్స్ సమస్యతో బాధపడుతోంది. ఈ క్రమంలో చికిత్స కోసం అదే ప్రాంతంలో ఉన్న డాక్టర్ వంశరాజ్ ద్వివేది క్లినిక్ కు వచ్చింది. ఆమెకు మత్తు ఇంజెక్షన్ ఇచ్చి 45 నిమిషాల పాటు నిద్రపోవాలని ద్వివేది సూచించాడు. ఆ తర్వాత ఆమె మత్తులోకి జారుకుంది. అనంతరం ఆమెపై అత్యాచారం చేసి, దాన్ని వీడియో తీశాడు.
ఆ తర్వాత ఆ వీడియోను బాధితురాలికి పంపి, తనతో శారీరక సంబంధం పెట్టుకోవాలని ద్వివేది ఒత్తిడి చేశాడు. ఆ తర్వాత ఆమె ఓ యువకుడిని పెళ్లి చేసుకున్న తర్వాత కూడా ఆమెను బెదిరించాడు. ద్వివేది బెదిరింపులను తట్టుకోలేకపోయిన ఆమె... జరిగిన విషయాన్ని తన భర్తతో చెప్పింది. అనంతరం భార్యాభర్తలు ఇద్దరూ వచ్చి పోలీసులకు ఫిర్యాదు చేశారు. కేసు నమోదు చేసిన పోలీసులు... ద్వివేదిని అరెస్ట్ చేశారు.
