Ambati Rambabu: అమరావతి కోసం 24 మంది చనిపోయారా..? గుంటూరులో ఉన్న నాకే ఆ విషయం తెలియదే!: అంబటి
- అసత్య ప్రచారం చేస్తున్నారంటూ ఆగ్రహం
- టీడీపీ మాట మార్చే రోజు వస్తుందని వ్యాఖ్యలు
- సభలో ఆసక్తికర వ్యాఖ్యలు చేసిన అంబటి
మూడు రాజధానులే ముద్దు అంటూ వైసీపీ, అమరావతి కావాలని టీడీపీ... అసెంబ్లీ సమావేశాల ప్రారంభదినం నాడు సభలో అధికార, విపక్షాల మధ్య తీవ్రస్థాయిలో వాగ్యుద్ధాలు నడిచాయి. ఈ క్రమంలో వైసీపీ ఎమ్మెల్యే అంబటి రాంబాబు సభలో మాట్లాడుతూ ఆసక్తికర వ్యాఖ్యలు చేశారు.
"అమరావతి కోసం 24 మంది రైతులు చనిపోయారని ప్రచారం చేస్తున్నారు. గుంటూరులో ఉన్న నాకే ఆ విషయం తెలియదు. అంతా అసత్య ప్రచారమే" అంటూ మండిపడ్డారు. టీడీపీ మాట మార్చే రోజు వస్తుందని, విశాఖను కార్యనిర్వాహక రాజధానిగా మేం ఎప్పుడు వద్దన్నాం అంటూ మరో మాట చెప్పడం ఖాయమని అన్నారు. గతంలో ఇంగ్లీషు మీడియం విషయంలోనూ ఇలాగే వ్యవహరించి, ఆ తర్వాత మేమెప్పుడు వద్దన్నామంటూ టీడీపీ నేతలు మాట మార్చారని ఆరోపించారు. 'మాది తుగ్లక్ ప్రభుత్వం అంటున్నారు, ఉమ్మడి రాజధాని వదిలేసి వచ్చిన మీదే తుగ్లక్ పాలన అంటూ విమర్శించారు.