Kumaraswamy: బెంగళూరుకు కాంగ్రెస్ సురక్షితం కాదు: కుమారస్వామి
- కాంగ్రెస్-జేడీఎస్ ల మధ్య పేలుతున్న మాటలు తూటాలు
- రాజరాజేశ్వరినగర్ ఉపఎన్నికలో పోటీ పడుతున్న ఇరు పార్టీలు
- కాంగ్రెస్ విషయం అందరికీ అర్థమైందన్న కుమారస్వామి
మొన్నటి దాకా కర్ణాటకలో అధికారాన్ని పంచుకున్న జేడీఎస్, కాంగ్రెస్ పార్టీల మధ్య మాటల తూటాలు పేలుతున్నాయి. బెంగళూరులోని రాజరాజేశ్వరినగర్ శాసనసభ ఉపఎన్నిక నేపథ్యంలో ఇరు పార్టీలు తమ అభ్యర్థులను బరిలోకి దించాయి. ఈ నేపథ్యంలో, ఒకరిపై మరొకరు తీవ్ర విమర్శలు చేసుకుంటున్నారు. ఈ సందర్భంగా జేడీఎస్ అధినేత కుమారస్వామి మాట్లాడుతూ కర్ణాటకకు, బెంగళూరుకు కాంగ్రెస్ పార్టీ సురక్షితం కాదని అన్నారు.
ఇటీవల బెంగళూరులో అల్లర్లు చోటు చేసుకున్న సంగతి తెలిసిందే. కాంగ్రెస్ ఎమ్మెల్యే శ్రీనివాస్ మూర్తి ఇంటికి నిప్పు పెట్టిన తర్వాత అల్లర్లు జరిగాయి. ఈ అంశాన్ని బీజేపీ తనకు అనుకూలంగా వాడుకుంది. దీనిపై కుమారస్వామి మాట్లాడుతూ, ఇప్పుడు అసలు విషయం అందరికీ అర్థమవుతోందని... బెంగళూరుకు కాంగ్రెస్ సురక్షితం కాదనే విషయం ఓటర్లకు అర్థమైందని అన్నారు. ఎవరికి ఓటు వేయాలనే విషయంలో ఓటర్లు సరైన నిర్ణయం తీసుకుంటారని చెప్పారు.