Bigg Boss: బిగ్ బాస్ రన్నరప్ అఖిల్ కు టీఆర్ఎస్ నాయకుడి సన్మానం!
- అఖరి మెట్టు వరకూ వెళ్లిన అఖిల్
- రెండో స్థానంతో సరిపెట్టుకుని ఇంటికి
- అంతవరకూ వెళ్లడమే అభినందనీయమన్న రేగిళ్ల
టాలీవుడ్ బిగ్ బాస్ సీజన్ 4లో ఆఖరి మెట్టు వరకూ వెళ్లి, రెండో స్థానంతో సరిపెట్టుకున్న అఖిల్ ను తెలంగాణ రాష్ట్ర సమితి యువజన విభాగం నాయకుడు సత్కరించారు. ఆదివారం జరిగిన గ్రాండ్ ఫినాలేలో టాప్-2లో అభిజిత్, అఖిల్ నిలువగా, చివరకు అభిజిత్ విజేతగా నిలిచిన సంగతి తెలిసిందే. ఆపై కంటెస్టెంట్లు తమ ఇళ్లకు చేరుకోగా, టీఆర్ఎస్ యూత్ నాయకుడు రేగిళ్ల సతీశ్ రెడ్డి, అఖిల్ వద్దకు వెళ్లి సన్మానించారు. ఈ షోలో ఫైనల్ వరకూ వెళ్లి, రన్నరప్ గా నిలవడం అభినందనీయమని అన్నారు. హైదరాబాద్ లోని తన ఇంటికి చేరిన అఖిల్ ను అభినందించేందుకు వందలాది మంది అభిమానులు వచ్చి సందడి చేశారు.
