Bandi Sanjay: ఈ ఎన్నికల్లో టీఆర్ఎస్ ఎలా గెలిచిందో ప్రజలకు తెలుసు: బండి సంజ‌య్
- టీఆర్ఎస్‌కు ప్ర‌త్యామ్నాయం బీజేపీనే
- పీఆర్సీపై ప్ర‌భుత్వం నాట‌కాలు ఆడుతోంది
- పట్టభద్రులను బెదిరింపులకు గురిచేశారు
- ఎమ్మెల్సీ ఎన్నికల్లో నైతిక విజయం మాదే
తెలంగాణ‌లో టీఆర్ఎస్‌కు ప్ర‌త్యామ్నాయం త‌మ పార్టీనే అని బీజేపీ రాష్ట్ర అధ్య‌క్షుడు బండి సంజ‌య్ అన్నారు. ఎమ్మెల్సీ ఎన్నికల్లో త‌మ పార్టీ అభ్య‌ర్థులు ఓడిపోయిన నేప‌థ్యంలో ఆయ‌న ఈ రోజు హైద‌రాబాద్‌లో మీడియాతో మాట్లాడుతూ.. పీఆర్సీపై ప్ర‌భుత్వం నాట‌కాలు ఆడుతోందని చెప్పారు. ఉద్యోగులకు మంచి చేస్తే తాము సంతోషిస్తామ‌ని చెప్పారు.
టీఆర్ఎస్ నేత‌లు పట్టభద్రులను బెదిరింపులకు గురిచేశారని ఆయ‌న ఆరోపించారు. ఎమ్మెల్సీ ఎన్నికల్లో నైతిక విజయం బీజేపీదేనని చెప్పుకొచ్చారు. ఈ ఎన్నికల్లో టీఆర్ఎస్ ఎలా గెలిచిందో ప్రజలకు తెలుసని ఆయ‌న వ్యాఖ్యానించారు. త‌మ పార్టీ ఓటు శాతం పెరిగింద‌ని, దీంతో అధికార టీఆర్ఎస్ పార్టీలో ఆందోళన మొదలైందని తెలిపారు. త‌మ పార్టీ ఓటమే లక్ష్యంగా ఇత‌ర పార్టీలు పనిచేశాయని బండి సంజ‌య్ అన్నారు.