America: ఇక కరోనా వైరస్ ఏదైనా ఒకటే వ్యాక్సిన్.. అభివృద్ధి చేసిన అమెరికా శాస్త్రవేత్తలు
- యూనివర్సల్ కరోనా వైరస్ వ్యాక్సిన్ ఆవిష్కరణ
- అభివృద్ధి చేసిన నార్త్ కరోలినా యూనివర్సిటీ శాస్త్రవేత్తలు
- ఎలుకలపై జరిపిన పరిశోధనలో రుజువైన సమర్థత
- భవిష్యత్ మహమ్మారులను దృష్టిలో పెట్టుకుని టీకా అభివృద్ధి
కరోనా వైరస్‌లో రోజుకో వేరియంట్ వెలుగు చూస్తున్నాయి. ప్రస్తుతం అందుబాటులో ఉన్న వ్యాక్సిన్లు ఏదో ఒక వేరియంట్‌ను లక్ష్యంగా చేసుకుని అభివృద్ధి చేసినవే. మున్ముందు మరెన్ని వైరస్‌లు చుట్టుముడతాయో చెప్పలేం. ఈ నేపథ్యంలో భవిష్యత్ కరోనా మహమ్మారులను దృష్టిలో పెట్టుకుని అమెరికా శాస్త్రవేత్తలు ‘యూనివర్సల్ కరోనా వైరస్ వ్యాక్సిన్’ను అభివృద్ధి చేశారు. ఇది కరోనా వైరస్‌పైనే కాకుండా మరిన్ని వైరస్‌లపైనా సమర్థంగా పనిచేస్తున్నట్టు ప్రయోగాల్లో తేలింది.
అమెరికాలోని నార్త్ కరోలినా యూనివర్సిటీ శాస్త్రవేత్తలు ఈ వ్యాక్సిన్‌ను రూపొందించారు. జంతువుల నుంచి మానవులకు సోకే కరోనా వైరస్ కుటుంబానికి చెందిన ఇతర వైరస్‌లను ఎదుర్కొనేలా దీనిని అభివృద్ధి చేశారు. ఎలుకలపై జరిపిన పరిశోధనలో ఈ యూనివర్సల్ కరోనా వైరస్ వ్యాక్సిన్ సమర్థత వెల్లడైంది. ప్రమాదకర వేరియంట్లను ఎదుర్కొనేందుకు ఇది రోగ నిరోధక వ్యవస్థను ప్రేరేపిస్తున్నట్టు శాస్త్రవేత్తలు గుర్తించారు.