Vishal: హీరో విశాల్ కు అనుకూలంగా హైకోర్టు తీర్పు.. లైకా ప్రొడక్షన్స్ కు జరిమానా
- 'చక్ర' సినిమాకు సంబంధించిన వివాదం
- తాము తీయాలనుకున్న సినిమాను విశాల్ తీశాడంటూ కోర్టుకెక్కిన లైకా
- లైకా ప్రొడక్షన్స్ కు రూ. 5 లక్షల జరిమానా
- కోర్టుల మీద తనకున్న నమ్మకం నిజమైందన్న విశాల్
తమిళ హీరో విశాల్ కు మద్రాస్ హైకోర్టులో ఊరట లభించింది. ఆయనపై నమోదైన కేసును కొట్టేసింది. వివరాల్లోకి వెళ్తే, విశాల్ నిర్మించిన 'చక్ర' అనే సినిమాకు సంబంధించిన వివాదం కోర్టులో నడుస్తోంది. ఈ సినిమా దర్శకుడు ఈ కథను తొలుత తమకు చెప్పాడని, ఆ కథ నచ్చి సినిమా తీసేందుకు తాము సిద్ధపడ్డామని... అయితే, ఆ తర్వాత దాన్ని విశాల్ సొంతంగా తీశాడని లైకా ప్రొడక్షన్స్ సంస్థ కోర్టుకెక్కింది. అయితే ఈ కేసును కోర్టు కొట్టివేసింది. అంతేకాదు లైకా ప్రొడక్షన్స్ కు రూ. 5 లక్షల జరిమానా విధించింది.
ఈ సందర్భంగా ట్వట్టర్ ద్వారా విశాల్ స్పందిస్తూ... న్యాయస్థానాల మీద తనకున్న నమ్మకం నిజమయిందని చెప్పాడు. ఎప్పటికైనా సత్యమే గెలుస్తుందనే విషయం మరోసారి రుజువయిందని తెలిపాడు. కేసును కోర్టు డిస్మిస్ చేయడంపై ఆనందం వ్యక్తం చేశాడు.