Hyderabad: శ్రీముఖి నటించిన ‘క్రేజీ అంకుల్స్’ సినిమా పోస్టర్లను త‌గులబెట్టిన మ‌హిళ‌లు.. హైద‌రాబాద్‌లో రాజార‌వీంద్ర, మ‌నోను అడ్డుకుని ఆందోళ‌న
- సినిమాలో మహిళలను కించ‌ప‌ర్చేలా డైలాగులున్నాయ‌ని ఆగ్ర‌హం
- తెలంగాణ మహిళా ఐక్య వేదిక ఆధ్వ‌ర్యంలో ఆందోళ‌న
- సమాజాన్ని తప్పుదోవ పట్టించేలా సీన్లు ఉన్నాయని అభ్యంత‌రాలు
టీవీ యాంకర్‌ శ్రీముఖి నటించిన ‘క్రేజీ అంకుల్స్’ సినిమా థియేట‌ర్ల‌లో విడుద‌లైంది. అయితే, ఈ సినిమా వివాదంలో చిక్కుకుంది. ఇటీవ‌ల విడుదలైన ఈ సినిమా ట్రైలర్‌లో మహిళలను కించపరిచేలా డైలాగులు ఉన్నాయని ఇప్ప‌టికే తెలంగాణ మహిళా ఐక్య వేదిక మండిప‌డింది. సినిమాలో మహిళలను కించపరిచేలా డైలాగులు ఉన్నాయని మ‌హిళ‌లు అభ్యంత‌రాలు తెలిపారు. వాటిని తొల‌గించాల‌ని డిమాండ్ చేశారు.
అయిన‌ప్ప‌టికీ, ఈ సినిమా విడుద‌ల కావ‌డంతో థియేట‌ర్ వ‌ద్ద మ‌హిళల ఆందోళ‌న‌తో ఉద్రిక్త‌త నెల‌కొంది. 'క్రేజీ అంకుల్స్' చిత్రం పోస్టర్లను మ‌హిళ‌లు త‌గుల‌బెట్టారు. మూసాపేట‌లోని శ్రీరాములు థియేటర్‌కు వ‌చ్చిన ఈ సినిమా న‌టులు రాజా ర‌వీంద్ర, మ‌నోను మ‌హిళ‌లు అడ్డుకున్నారు. ఈ సినిమాలో సమాజాన్ని తప్పుదోవ పట్టించేలా సీన్లు ఉన్నాయని మండిప‌డ్డారు. సమాజంలో దంప‌తుల మధ్య చిచ్చుపెట్టేలా సినిమాలను తీయ‌డ‌మేంట‌ని ప్ర‌శ్నిస్తూ మ‌హిళ‌లు ఆందోళ‌న చేస్తున్నారు.