COVAXIN: 12 ఏళ్లు పైబడిన చిన్నారులకు వ్యాక్సిన్.. కొవాగ్జిన్‌కు అత్యవసర అనుమతులు
- అత్యవసర అనుమతులు మంజూరు చేసిన డీసీజీఐ
- 12-18 ఏళ్ల వయసు వారికి మాత్రమే
- చిన్నారుల కోసం అందుబాటులోకి రెండో టీకా
హైదరాబాద్‌కు చెందిన ప్రముఖ పార్మాస్యూటికల్స్ కంపెనీ భారత్ బయోటిక్ అభివృద్ధి చేసిన కొవాగ్జిన్ టీకాను 12 ఏళ్లు పైబడిన వారికి ఇచ్చేందుకు అత్యవసర అనుమతులు లభించాయి. భారత ఔషధ నియంత్రణ మండలి (డీసీజీఐ) ఈ మేరకు ప్రకటించింది. ఈ టీకాను 12 నుంచి 18 ఏళ్లలోపు వారికి మాత్రమే ఇస్తారు. జైడస్ కాడిలా అభివృద్ధి చేసిన జైకోవ్-డి తర్వాత చిన్నారులకు ఇచ్చేందుకు అనుమతులు పొందిన రెండో టీకా ఇదే.
ఒమిక్రాన్ వేరియంట్ వ్యాప్తి క్రమంగా పెరుగుతున్న వేళ కొవాగ్జిన్‌కు అనుమతులు లభించడం కొంత ఊరటనిచ్చే అంశమే. కొవాగ్జిన్ టీకాను ఇప్పటికే 18 ఏళ్లు పైబడిన వారికి ఇస్తున్నారు. అయితే, ఈ టీకా పంపిణీ ప్రభుత్వ విధానాలపై ఆధారపడి ఉంటుంది. అలాగే, టీకాల కోసం భారత్ బయోటెక్‌కు ప్రభుత్వం ఆర్డర్ ఇవ్వాల్సి ఉంటుంది. కొవాగ్జిన్ టీకా మొదటి డోసు వేసిన 28 రోజులకు రెండో డోసు వేస్తారు. ఈ టీకాతో పిల్లలకు కరోనా నుంచి రక్షణ లభిస్తుందని క్లినికల్ పరీక్షల్లో వెల్లడైనట్టు భారత్ బయోటెక్ తెలిపింది.
మరోవైపు, జనవరి మూడో తేదీ నుంచి దేశంలోని 15-18 ఏళ్ల మధ్య వారికి టీకాలు ఇవ్వనున్నట్టు ప్రధానమంత్రి నరేంద్రమోదీ గత రాత్రి ప్రకటించారు. జాతినుద్దేశించి ప్రసంగించిన మోదీ ఈ విషయాన్ని వెల్లడించారు. 60 ఏళ్ల వయసు దాటి, ఇతర ఆరోగ్య సమస్యలున్న వారికి వైద్యుల సలహాపై ‘ప్రికాషన్ డోసు’ ఇవ్వనున్నట్టు చెప్పారు. ఆరోగ్య సిబ్బందికి, ఫ్రంట్‌లైన్ వర్కర్లకు జనవరి 10 నుంచి టీకాలు వేయనున్నట్టు మోదీ తెలిపారు.