TSRTC: 12 ఏళ్ల లోపు చిన్నారులకు రేపు ఉచిత ప్రయాణం.. టీఎస్ఆర్టీసీ బంపరాఫర్!
- నూతన సంవత్సరాన్ని పురస్కరించుకుని సజ్జనార్ ఉత్తర్వులు
- రాష్ట్రంలోని ఎక్కడి నుంచి ఎక్కడికైనా ప్రయాణించే అవకాశం
- ఉత్తర్వులు జారీ చేసిన ఆర్టీసీ ఎండీ సజ్జనార్
చిన్నారులకు టీఎస్ ఆర్టీసీ బంపరాఫర్ ప్రకటించింది. నూతన సంవత్సరాన్ని పురస్కరించుకుని 12 ఏళ్లలోపు పిల్లలందరికీ రేపు ఉచిత ప్రయాణం సౌకర్యం కల్పిస్తున్నట్టు తెలిపింది. ఈ మేరకు ఆ సంస్థ ఎండీ వీసీ సజ్జనార్ నిన్న ఉత్తర్వులు జారీ చేశారు.
ఈ ఆఫర్ 12 ఏళ్లలోపు చిన్నారులకు మాత్రమే వర్తిస్తుందని, వారు రేపు రాష్ట్రంలోని ఎక్కడి నుంచి ఎక్కడికైనా టీఎస్ఆర్టీసీ బస్సుల్లో ఉచితంగా ప్రయాణించవచ్చని పేర్కొన్నారు. తల్లిదండ్రులతో కలిసి ప్రయాణించే వారి నుంచి టికెట్ చార్జీలు వసూలు చేయబోమన్నారు. ఈ ఆఫర్‌ను ప్రజల్లోకి విస్తృతంగా తీసుకెళ్లి సద్వినియోగం చేసుకునేలా చూడాలని అధికారులను సజ్జనార్ కోరారు.