Sudheer Babu: యాక్షన్ థ్రిల్లర్ ను పట్టాలెక్కించిన యంగ్ హీరో!
- నిరాశపరిచిన 'శ్రీదేవి సోడా సెంటర్'
- రిలీజ్ కి రెడీగా 'ఆ అమ్మాయి గురించి మీకు చెప్పాలి'
- సెట్స్ పైకి వెళ్లిన కొత్త ప్రాజెక్టు
- దర్శకుడిగా మహేశ్ సూరపనేని
మొదటి నుంచి కూడా సుధీర్ బాబు విభిన్నమైన కథలను .. పాత్రలను ఎంచుకుంటూ వస్తున్నాడు. కొంతకాలంగా ఆయన ఒకదాని తరువాత ఒకటిగా సినిమాలు చేసుకుంటూ వెళుతున్నాడుగానీ, విజయాలు మాత్రం దక్కడం లేదు. ఈ మధ్య ఆయన నుంచి వచ్చిన 'శ్రీదేవి సోడా సెంటర్' కూడా ప్రేక్షకులను నిరాశపరిచింది.
ఆయన తాజా చిత్రంగా ప్రేక్షకుల ముందుకు రావడానికి 'ఆ అమ్మాయి గురించి మీకు చెప్పాలి' సినిమా సిద్ధంగా ఉంది. ఇందగ్రంటి మోహనకృష్ణ దర్శకత్వం వహించిన ఈ సినిమాలో, సుధీర్ బాబు సరసన నాయికగా కృతి శెట్టి అలరించనుంది. ఈ సినిమా విడుదలకు ముస్తాబవుతూ ఉండగానే, ఆ తరువాత సినిమాను ఆయన పట్టాలెక్కించాడు.
కెరియర్ పరంగా సుధీర్ బాబుకి ఇది 16వ సినిమా. భవ్య క్రియేషన్స్ బ్యానర్ పై నిర్మితమవుతున్న ఈ సినిమాకి, మహేశ్ సూరపనేని దర్శకత్వం వహిస్తున్నాడు. శ్రీకాంత్ .. 'ప్రేమిస్తే' ఫేమ్ భరత్ ముఖ్యమైన పాత్రలలో కనిపించనున్నారు. ఈ సినిమాకి సంబంధించిన మిగతా వివరాలు త్వరలో తెలియనున్నాయి.