Pat Cummins: ప్యాట్ కమిన్స్ వీరబాదుడు... ఆ పేరు గలవాళ్లకు సగానికి సగం రాయితీ ప్రకటించిన రెస్టారెంట్
- గతరాత్రి ముంబయి వర్సెస్ కోల్ కతా
- బ్యాటింగ్ లో విశ్వరూపం చూపించిన ప్యాట్ కమిన్స్
- 15 బంతుల్లోనే 56 రన్స్
- మీ పేరు ప్యాట్ అయితే 50 శాతం రాయితీ అంటున్న రెస్టారెంట్
గత రాత్రి ముంబయి ఇండియన్స్, కోల్ కతా నైట్ రైడర్స్ మ్యాచ్ చూసినవాళ్లు ఆసీస్ ఆటగాడు ప్యాట్ కమిన్స్ విశ్వరూపాన్ని అంత తేలిగ్గా మర్చిపోలేరు. కోల్ కతా జట్టు తరఫున ఈ సీజన్ లో తొలి మ్యాచ్ ఆడిన ప్యాట్ కమిన్స్ కేవలం 15 బంతుల్లోనే 56 పరుగులు చేసి జట్టును విజయతీరాలకు చేర్చాడు. కమిన్స్ స్కోరులో 4 ఫోర్లు, 6 భారీ సిక్సులున్నాయి. ఐపీఎల్ చరిత్రలో ఫాస్టెస్ట్ ఫిఫ్టీ రికార్డు (గతంలో కేఎల్ రాహుల్)ను ప్యాట్ కమిన్స్ సమం చేశాడు.
ఈ నేపథ్యంలో, ఓ రెస్టారెంట్ కస్టమర్లకు బంపర్ ఆఫర్ ఇచ్చింది. నిన్నటి మ్యాచ్ లో ప్యాట్ కమిన్స్ మ్యాన్ ఆఫ్ ద మ్యాచ్ గా నిలిచాడని, అందుకే ప్యాట్ అనే పేరు గల వాళ్లు తమ రెస్టారెంటులో భోజనం చేస్తే బిల్లులో 50 శాతం రాయితీ ఇస్తామని ప్రకటించింది. ఈ మేరకు రెస్టారెంట్ లో ఓ బోర్డు పెట్టింది. దీనికి సంబంధించిన ఫొటోను కోల్ కతా నైట్ రైడర్స్ తన ట్విట్టర్ అకౌంట్ లో పంచుకుంది.