YSRCP: జ‌న‌సేన త‌న పార్టీ అని ప‌వ‌న్ మ‌రిచిపోయిన‌ట్టున్నారు: స‌జ్జ‌ల

• చంద్ర‌బాబు వ్యూహాల‌నే ప‌వ‌న్ వ‌ల్లె వేస్తున్నారన్న సజ్జల 
• రాజ‌కీయంగా సీరియ‌స్‌గా ఉన్నవారు ఒంట‌రి పోటీకే ఆస‌క్తి చూపిస్తారని కామెంట్ 
• ప‌వ‌న్ మాత్రం ఓ విశ్లేష‌కుడిలా పొత్తులపై ఆప్ష‌న్లు చెప్పార‌న్న స‌జ్జ‌ల‌

---

2024 ఎన్నిక‌ల్లో పొత్తుల‌కు సంబంధించి జ‌న‌సేన అధినేత ప‌వ‌న్ క‌ల్యాణ్ ఇటీవ‌ల చేసిన వ్యాఖ్య‌లు, సోమ‌వారం విజ‌య‌వాడ‌లో బీజేపీ జాతీయ కార్య‌ద‌ర్శి స‌త్య‌కుమార్ చేసిన వ్యాఖ్య‌ల‌పై వైసీపీ ప్ర‌ధాన కార్య‌ద‌ర్శి, ఏపీ ప్రభుత్వ ముఖ్య స‌ల‌హాదారు స‌జ్జ‌ల రామ‌కృష్ణారెడ్డి మంగ‌ళ‌వారం స్పందించారు. ఓ టీవీ ఛానెల్‌తో మాట్లాడిన సంద‌ర్భంగా స‌జ్జ‌ల ఈ మేర‌కు కీల‌క వ్యాఖ్య‌లు చేశారు.

రాజ‌కీయంగా సీరియస్‌గా ఉన్న వాళ్లు ఒంట‌రిగానే పోటీ చేయాల‌ని అనుకుంటార‌ని స‌జ్జ‌ల అన్నారు. అయితే ప‌వ‌న్ క‌ల్యాణ్ ఓ రాజ‌కీయ నాయ‌కుడిగా కాకుండా ఓ విశ్లేష‌కుడిగా పొత్తుల‌పై ఆప్ష‌న్లు ఇచ్చార‌ని ఆయ‌న వ్యాఖ్యానించారు. జ‌న‌సేన త‌న పార్టీ అన్న విష‌యాన్ని ప‌వ‌న్ మ‌రిచిపోయిన‌ట్టుగా ఉన్నార‌ని కూడా స‌జ్జ‌ల ఆస‌క్తిక‌ర కామెంట్లు చేశారు. చంద్ర‌బాబు వ్యూహాల‌నే ప‌వ‌న్ వ‌ల్లె వేస్తున్న‌ట్లుగా అనిపిస్తోంద‌ని ఆయ‌న వ్యాఖ్యానించారు. పొత్తుల‌పై ప‌వ‌న్ ఓ మాట‌, జ‌న‌సేన‌తో పొత్తు క‌లిగిన బీజేపీ నేత‌లు మ‌రో మాట మాట్లాడుతున్నార‌ని స‌జ్జ‌ల అన్నారు.