Saad Ansari: నుపుర్ శర్మకు మద్దతు పలికాడంటూ ముస్లిం వ్యక్తిపై దాడి
- మహ్మద్ ప్రవక్తపై నుపుర్ అనుచిత వ్యాఖ్యలు
- నుపుర్ శర్మపై ముస్లిం సమాజం ఆగ్రహం
- నుపుర్ ధైర్యశాలి అని పేర్కొన్న సాద్ అన్సారీ
- భివాండీలో ఉద్రిక్తతలు
మహ్మద్ ప్రవక్త పట్ల అవమానకర వ్యాఖ్యలు చేసిందంటూ బీజేపీ బహిష్కృత నేత నుపుర్ శర్మపై ముస్లిం సమాజం తీవ్ర ఆగ్రహావేశాలతో ఉంది. ఈ నేపథ్యంలో, నుపుర్ శర్మకు మద్దతు పలికాడంటూ ఓ ముస్లిం యవకుడిపై సాటి ముస్లింలే దాడి చేసిన వైనం మహారాష్ట్రలో వెలుగుచూసింది. భివాండీలో ఈ ఘటన జరిగింది. అతడి పేరు సాద్ అన్సారీ. నుపుర్ శర్మకు సంఘీభావం ప్రకటించడమే కాదు, ఆమెను ధైర్యశాలి అయిన మహిళగా అభివర్ణించాడు. ఈ మేరకు సోషల్ మీడియాలో పోస్టు చేశాడు.
అయితే, ఇతర ముస్లింల నుంచి అతడికి తీవ్ర వ్యతిరేకత ఎదురైంది. పెద్ద సంఖ్యలో ముస్లింలు అతడి ఇంటిని ముట్టడించారు. పోస్టులు తొలగించడమే కాకుండా, క్షమాపణలు చెప్పాలంటూ డిమాండ్ చేశారు. ఆపై ఆ యువకుడిపై దాడికి దిగారు. ఆ ప్రాంతంలో ఉద్రిక్తతలు చోటుచేసుకోవడంతో అక్కడికి వచ్చిన పోలీసులు బాధిత యువకుడ్ని అరెస్ట్ చేశారు. రెండు గ్రూపుల మధ్య మత ప్రాతిపదికన విద్వేషాలు రగిల్చేందుకు ప్రయత్నించాడంటూ అతడిపై ఐపీసీ 153 (ఏ) కింద అభియోగాలు మోపారు.