Deepak Hooda: దీపక్ హుడా సక్సెస్.. సెలక్టర్లకు సంకటస్థితి!
- గతంలో ఎన్నడూ ఇన్నింగ్స్ ఆరంభించలేదన్న హుడా
- సవాళ్లను స్వీకరించాల్సిందేనని వ్యాఖ్య
- వేరే అవకాశం లేనప్పుడు ఎందుకు పోరాడకూడదని ప్రశ్న
దీపక్ హుడా.. ఈ పేరు క్రికెట్ అభిమానులకు సైతం పెద్దగా పరిచయం లేనిది. ఐపీఎల్ 2022 సీజన్ లో లక్నో జట్టు తరఫున అవకాశం లభించడంతో దీపక్ హుడా తన ప్రతిభను నిరూపించుకున్నాడు. దీంతో ఐర్లాండ్ తో రెండు టీ20 మ్యాచుల కోసం బీసీసీఐ హుడాకు అవకాశం ఇచ్చింది. గాయం కారణంగా రుతురాజ్ దూరంగా ఉండడంతో ఆ అవకాశం హుడాకు దక్కింది. దీంతో మొదటి మ్యాచ్ లో 47 పరుగులతో అతడు తన సత్తా చాటాడు. రెండో మ్యాచ్ లోనూ సెంచరీ సాధించి జట్టు విజయానికి తోడ్పడ్డాడు. అందుకే మ్యాన్ ఆఫ్ ద సిరీస్ గా ఎంపికయ్యాడు.
"అంతర్జాతీయ మ్యాచులే కాదు. మరే ఇతర మ్యాచ్ లోనూ నేను ఇన్నింగ్స్ ఆరంభించలేదు. టాప్ ఆర్డర్ బ్యాట్స్ మ్యాన్ గా మన ముందున్న సవాళ్లను స్వీకరించాలి. నీ ముందు మరో అవకాశం లేనప్పుడు ఒక యోధుడిగా ముందుకు ఎందుకు వెళ్లకూడదు? నేను ఇలానే ఆలోచిస్తాను’’ అని హుడా వివరించాడు.