Venu Udugula: 'విరాటపర్వం' దర్శకుడి నుంచి పొలిటికల్ యాక్షన్ థ్రిల్లర్!
- ఇటీవలే వచ్చిన 'విరాటపర్వం'
- మంచి మార్కులు కొట్టేసిన వేణు ఊడుగుల
- తరువాత ప్రాజెక్టుకు సన్నాహాలు
- జోనర్ ఏమిటనేది చెప్పేసిన దర్శకుడు
వేణు ఊడుగుల తన సినిమాల కోసం తయారు చేసుకునే కథలు వాస్తవానికి చాలా దగ్గరగా ఉంటాయి. తన కథల్లోని పాత్రలు ఆకాశంలో నుంచి ఊడిపడినట్టుగా కాకుండా సహజత్వానికి చాలా దగ్గరగా నడిపించుకుంటూ వెళతాడు. ఇటీవల ఆయన నుంచి వచ్చిన 'విరాటపర్వం' సినిమా కూడా ఇదే విషయాన్ని నిరూపించింది.
ఈ సినిమా భారీ వసూళ్లను రాబట్టలేకపోయినా, ఒక మంచి ప్రయత్నం అనిపించుకుంది. దాదాపు బయోపిక్ లక్షణాలతో వచ్చిన ఈ సినిమా ఆయనకి ప్రశంసలు తెచ్చిపెట్టింది. ఆ తరువాత ఆయన సినిమా ఏ హీరోతో ఉండనుందనేది ఆసక్తికరంగా మారింది. త్వరలోనే ఆ విషయాన్ని వెల్లడిస్తాడని వేణు ఊడుగుల చెబుతున్నాడు.
ఈ సారి తాను పొలిటికల్ యాక్షన్ థ్రిల్లర్ నేపథ్యంలో ఒక కథను రెడీ చేసుకున్నట్టుగా ఆయన చెప్పాడు. ఇది తాను తయారు చేసుకున్న కల్పిత కథ అనీ ... పూర్తి కమర్షియల్ అంశాలతో ఉంటుందని అన్నాడు. హీరో .. హీరోయిన్ ఎవరనే విషయాలతో పాటు మిగతా వివరాలను త్వరలోనే ప్రకటిస్తానని చెప్పుకొచ్చాడు.
