BJP: మునుగోడులో కేసీఆర్ అడిగిన ప్ర‌తి ప్ర‌శ్న‌కూ సమాధానం చెబుతాం: బండి సంజయ్
- కేసీఆర్‌కు మునుగోడు భ‌యం ప‌ట్టుకుంద‌న్న సంజయ్
- అందుకే ఏం మాట్లాడుతున్నారో తెలియ‌కుండానే ప్ర‌సంగించార‌ని ఎద్దేవా
- మునుగోడులో కేసీఆర్ అవినీతి చిట్టా విప్పుతామ‌ని వెల్ల‌డి
మునుగోడులో శ‌నివారం జ‌రిగిన టీఆర్ఎస్ బ‌హిరంగ స‌భ‌లో సీఎం కేసీఆర్ చేసిన వ్యాఖ్య‌ల‌పై తాజాగా ఆదివారం బీజేపీ తెలంగాణ అధ్య‌క్షుడు బండి సంజయ్ స్పందించారు. మునుగోడు స‌భ‌లో కేసీఆర్ అడిగిన ప్ర‌తి ప్ర‌శ్న‌కు సమాధానం చెబుతామ‌ని సంజయ్ అన్నారు. కేసీఆర్ ప్ర‌శ్న‌లు అడిగిన మునుగోడులోనే వాటికి స‌మాధానాలు చెబుతామ‌ని ఆయ‌న అన్నారు. కేసీఆర్ ప్ర‌శ్న‌ల‌కు స‌మాధానాలు చెప్ప‌డంతోనే ఆగేది లేద‌న్న సంజయ్.. మునుగోడు స‌భ‌లో కేసీఆర్ అవినీతి చిట్టా విప్పుతామ‌ని కూడా చెప్పారు.
కేసీఆర్‌కు ప్ర‌స్తుతం మునుగోడు భ‌యం ప‌ట్టుకుంద‌ని బండి సంజయ్ అన్నారు. ఈ కార‌ణంగానే శ‌నివారం నాటి మునుగోడు స‌భ‌లో తానేం మాట్లాడుతున్నాన‌న్న విష‌యాన్ని మ‌ర‌చి కేసీఆర్ ప్ర‌సంగించార‌ని ఎద్దేవా చేశారు. మ‌రికాసేప‌ట్లో మునుగోడులో బీజేపీ స‌భ ప్రారంభం కానున్న సంగ‌తి తెలిసిందే. కాంగ్రెస్‌కు రాజీనామా చేసిన కోమ‌టిరెడ్డి రాజ‌గోపాల్ రెడ్డిని బీజేపీలోకి ఆహ్వానించేందుకే ఈ స‌భ జ‌రుగుతున్న విష‌యం విదిత‌మే. ఈ స‌భ‌కు కేంద్ర హోం శాఖ మంత్రి అమిత్ షా హాజ‌రవుతున్నారు.