Etela Rajender: మునుగడు సభలో కేసీఆర్ పై తీవ్ర విమర్శలు గుప్పించిన ఈటల రాజేందర్
- మునుగోడు ప్రజలు కోమటి రెడ్డి వెంటే ఉన్నారు
- కేసీఆర్ కు కమ్యూనిస్టులు మద్దతు పలకడం సిగ్గుచేటు
- కేసీఆర్ ను ప్రజలు బంగాళాఖాతంలో కలిపేస్తారు
తన చిరకాల మిత్రుడు కోమటిరెడ్డి రాజగోపాల్ రెడ్డి మునుగోడు ప్రజలు ఇచ్చిన ధైర్యంతో... ఎమ్మెల్యే పదవికి రాజీనామా చేసి కేసీఆర్ పాలనపై సమరశంఖం మోగించారని బీజేపీ ఎమ్మెల్యే ఈటల రాజేందర్ అన్నారు. మునుగోడు ప్రజలు కూడా రాజగోపాల్ వెంటే ఉన్నారని... హుజూరాబాద్ లో బీజేపీని గెలిపించిన దానికంటే పెద్ద మెజార్టీతో రాజగోపాల్ రెడ్డిని గెలిపిస్తామని అంటున్నారని చెప్పారు.
కేసీఆర్ ది శాడిస్టిక్ మెంటాల్టీ అని... అందుకే ఈరోజు మునుగోడులో అమిత్ షా సభ ఉంటే... నిన్న హడావుడిగా కేసీఆర్ సభ పెట్టుకున్నారని ఎద్దేవా చేశారు. దేశంలో అత్యధిక ప్రజల ప్రేమను పొందిన నేత ప్రధాని మోదీ అని... అలాంటి మోదీని బంగాళాఖాతంలో ముంచేస్తామని కేసీఆర్ అన్నారని చెప్పారు. తెలంగాణ ప్రజలు కేసీఆర్ ను బంగాళాఖాతంలో ముంచేస్తారని అన్నారు.
బీజేపీ గెలిస్తే వ్యవసాయానికి మీటర్లు పెడతారని కేసీఆర్ జనాలను తప్పుదోవ పట్టించే ప్రయత్నం చేస్తున్నారని... దేశంలో ఎక్కడా కేంద్ర ప్రభుత్వం మీటర్లను పెట్టించలేదనే విషయాన్ని ప్రజలు అర్థం చేసుకోవాలని ఈటల అన్నారు. కేసీఆర్ నిరాశ, నిస్పృహలతో మాట్లాడుతున్నారని ఎద్దేవా చేశారు.
