Bollywood: మ‌రోసారి బుర్జ్ ఖ‌లీఫాపై షారూఖ్ ఖాన్!
- ఈసారి షారూఖ్ పుట్టిన రోజుకు ముందే వెలిగిపోయిన భవనం
- స్పాన్స‌ర్ చేసిన యూఏఈ హెల్త్ కేర్ సర్వీస్ ప్రొవైడ‌ర్ బుర్జీల్ హోల్డింగ్స్
- బుర్జీల్ హోల్డింగ్స్ కు బ్రాండ్ అంబాసిడ‌ర్‌గా ఉన్న షారూఖ్
ప్రపంచంలోనే అత్యంత ఎత్తయిన భవనం దుబాయ్‌ బుర్జ్ ఖలీఫా త‌ర‌చూ వార్త‌ల్లో ఉంటుంది. వివిధ సంద‌ర్భాల‌ను పుర‌స్క‌రించుకొని ఈ కట్ట‌డం ఎల్ఈడీ స్ర్కీన్‌పై ప్ర‌త్యేక థీమ్‌ను ప్ర‌దర్శిస్తుంటారు. బాలీవుడ్ సీనియ‌ర్ న‌టుడు షారూఖ్ ఖాన్ పుట్టిన రోజు సంద‌ర్భంగా బుర్జ్ ఖలీఫా ఆయ‌న ముఖంతో వెలిగిపోతుంటుంది. అయితే, ఈ సారి షారూఖ్ పుట్టిన రోజుకు నెల ముందే బుర్జ్ ఖ‌లీఫాపై ఆయ‌న ఫొటో కనిపించింది. గురువారం ఈ బిల్డింగ్‌పై షారూఖ్ వీడియోతోపాటు ఆయ‌న న‌టించిన 'ఓ శాంతి ఓం' సినిమాలోని పాట‌ను ప్లే చేశారు. దీన్ని స‌మీపంలోని ప్ర‌జ‌లంతా ఆస‌క్తిగా గ‌మ‌నించారు. ఈ వీడియోను యూఏఈలో అతిపెద్ద హెల్త్‌కేర్ సర్వీస్ ప్రొవైడర్ల‌లో ఒకటైన బుర్జీల్ హోల్డింగ్స్ స్పాన్స‌ర్ చేసింది.
షారూఖ్ ఖాన్ బ్రాండ్ అంబాసిడ‌ర్‌గా ఉన్న ఈ సంస్థ యూఏఈలో 39 ఆసుపత్రులు, వైద్య కేంద్రాలను నిర్వ‌హిస్తోంది. ఈ క్ర‌మంలో షారూఖ్ ముఖంతో త‌మ బ్రాండ్‌కు ప్రచార కార్య‌క్ర‌మాలు చేప‌ట్టింది. ఇందులో భాగంగా బుర్జ్ ఖలీఫా బిల్డింగ్‌పై షారూఖ్ న‌టించిన త‌మ బ్రాండ్ ప్రచార వీడియోను ప్లే చేయించింది. ప్రచార ప్రారంభ కార్యక్రమంలో ముందుగా షారుఖ్ ఖాన్‌కు యూఏఈతో ఉన్న బలమైన అనుబంధాన్ని హైలైట్ చేసింది. 70 సెకన్ల నిడివి ఉన్న ఈ వీడియోలో షారూఖ్ హెల్త్‌కేర్ గ్రూప్ కథను వివరించారు. అంతకుముందు బుర్జ్ ఖలీఫాలోని మ్యూజికల్ ఫౌంటెన్ ఓం శాంతి ఓం సినిమా ట్యూన్‌లను ప్లే చేసింది. దాంతో, స‌మీపంలోని ప్ర‌జ‌లంతా అక్క‌డికి చేరుకోగా.. బుర్జ్ ఖలీఫా బిల్డింగ్ పై ప్రచార వీడియో ప్లే అయింది. ఇందుకు సంబంధించిన వీడియోలు ఇప్పుడు సోష‌ల్ మీడియాలో వైర‌ల్ అయ్యాయి.
కాగా, షారూఖ్ ఖాన్ ఇటీవల బ్రహ్మాస్త్ర చిత్రంలో అతిథి పాత్ర‌లో క‌నిపించారు. వ‌చ్చే ఏడాది షారూఖ్ మూడు సినిమాల‌తో ప్రేక్ష‌కుల ముందుకు రాబోతున్నారు. ముందుగా ప‌ఠాన్ చిత్రం జ‌న‌వ‌రిలో విడుద‌ల కానుంది. త‌ర్వాత జ‌వాన్‌, డుంకీ చిత్రాలు విడుద‌ల అవు‌తాయి.