Greg Barclay: ఐసీసీ చైర్మన్ గా మరోసారి గ్రెగ్ బార్ క్లే
- నేడు మెల్బోర్న్ లో ఐసీసీ సమావేశం
- చైర్మన్ పదవికి ఎన్నిక
- చివరి నిమిషంలో పోటీ నుంచి తప్పుకున్న జింబాబ్వే క్రికెట్ చీఫ్
- బార్ క్లే ఎన్నిక ఏకగ్రీవం
అంతర్జాతీయ క్రికెట్ మండలి (ఐసీసీ) చైర్మన్ గా న్యూజిలాండ్ కు చెందిన గ్రెగ్ బార్ క్లే మరోసారి నియమితులయ్యారు. ఆయన ఈ పదవిని చేపట్టడం వరుసగా రెండోసారి. ఆస్ట్రేలియాలోని మెల్బోర్న్ లో నేడు ఐసీసీ సమావేశం జరిగింది. ఐసీసీ చైర్మన్ ఎన్నిక నుంచి జింబాబ్వే క్రికెట్ బోర్డు చైర్మన్ డాక్టర్ తవెంగ్వా ముఖులాని తప్పుకోవడంతో గ్రెగ్ బార్ క్లే ఏకగ్రీవంగా ఎన్నికయ్యారు. ఆయన ఈ పదవిలో మరో రెండేళ్ల పాటు కొనసాగుతారు.
ఇవాళ్టి ఐసీసీ సమావేశంలో మొత్తం 17 మంది సభ్యుల్లో డజను మందికి పైగా బార్ క్లే నాయకత్వానికి మద్దతు పలికారు. భారత క్రికెట్ కంట్రోల్ బోర్డు (బీసీసీఐ) తరఫున ఈ సమావేశానికి కార్యదర్శి జై షా హాజరయ్యారు. ఆయన కూడా బార్ క్లేకు మద్దతు పలికారు.
గ్రెగ్ బార్ క్లే న్యూజిలాండ్ క్రికెట్ సంఘం మాజీ అధ్యక్షుడు. తొలిసారిగా 2020లో ఐసీసీ చైర్మన్ గా ఎన్నికయ్యారు. ఆయన పదవీకాలం ఈ నవంబరుతో ముగియనుంది. ఈ నేపథ్యంలోనే ఎన్నిక చేపట్టారు.
