Sania Mirza: సానియాతో విడాకుల పుకార్లకు చెక్ పెట్టిన షోయబ్ మాలిక్!
- సానియా పుట్టిన రోజు సందర్భంగా శుభాకాంక్షలు
చెబుతూ ట్వీట్ - ఈ ఇద్దరూ విడిపోతున్నారని కొన్నాళ్లుగా వార్తలు
- పాకిస్థాన్ లో టాక్ షో చేయబోతున్న దంపతులు
భారత టెన్నిస్ స్టార్ సానియా మీర్జా, పాకిస్థాన్ క్రికెటర్ షోయబ్ మాలిక్ దంపతులు విడాకులు తీసుకోబోతున్నారంటూ కొంతకాలంగా పుకార్లు వినిపిస్తున్నాయి. పాకిస్థాన్ కు చెందిన ఓ నటితో షోయబ్ మాలిక్ డేటింగ్ చేస్తున్నాడని, దాంతో, అతనికి సానియా దూరంగా ఉంటోందని వార్తలు వస్తున్నాయి. అయితే, ఈ వార్తలపై సానియా, మాలిక్ దంపతులు స్పందించలేదు. వాటిని ఖండించనూ లేదు. దాంతో, విడాకుల వార్తలు నిజమేనని అభిమానులు భావిస్తున్నారు.
ఇలాంటి సమయంలో షోయబ్ మాలిక్.. సానియా మీర్జాకు పుట్టిన రోజు శుభాకాంక్షలు తెలిపాడు. సానియా మంగళవారం 36వ పడిలోకి అడుగు పెట్టింది. ఈ సందర్భంగా సానియాతో దిగిన ఫొటోను ట్విట్టర్ లో షేర్ చేసిన మాలిక్.. ఆమెకు శుభాకాంక్షలు తెలపడంతో వీరిద్దరి విడాకుల పుకార్లకు చెక్ పెట్టే ప్రయత్నం చేశాడు. దీనికి బలం చేకూర్చేలా సానియా, షోయబ్ ఇద్దరూ కలిసి ఓ టాక్ షోను హోస్ట్ చేస్తున్నారు. పాకిస్థాన్ కు చెందిన ఓటీటీ ప్లాట్ ఫామ్ ఉర్దు ఫ్లిక్స్ లో ‘ద మీర్జా మాలిక్ షో’లో కనిపించనున్నారు.
