NVSS Prabhakar: గడ్డి కోస్తూ ఉంగరాన్ని పోగొట్టుకున్న మాజీ ఎమ్మెల్యే ఎన్వీఎస్ఎస్ ప్రభాకర్... ఇదిగో ఇలా వెదికారు!
- ఆవుల కోసం గడ్డి కోసిన మాజీ ఎమ్మెల్యే
- విలువైన నవరత్నాల ఉంగరం జారిపడిన వైనం
- రాచకొండ సీపీకి సమాచారం
- నిపుణుల బృందాన్ని పంపించిన రాచకొండ సీపీ
- కొన్ని నిమిషాల్లోనే ఉంగరం లభ్యం
ఉప్పల్ మాజీ ఎమ్మెల్యే, బీజేపీ నేత ఎన్వీఎస్ఎస్ ప్రభాకర్ ఇవాళ తన వ్యవసాయ క్షేత్రంలో ఉంగరాన్ని పోగొట్టుకున్నారు. ఆయన ఆవుల కోసం పచ్చి గడ్డి కోస్తుండగా ఉంగరం జారిపడింది. ఆ ఉంగరం నవరత్నాలతో కూడిన విలువైన వస్తువు కావడంతో ఆయన రాచకొండ పోలీస్ కమిషనర్ కు సమాచారం అందించారు.
దీనిపై వెంటనే స్పందించిన రాచకొండ కమిషనరేట్ ఓ ఉన్నతస్థాయి నిపుణుల బృందాన్ని వ్యవసాయ క్షేత్రానికి పంపించింది. వారి వెంట పోలీసు జాగిలాలు కూడా వచ్చాయి. వారి వద్ద ఉన్న సాంకేతిక పరికరాల సాయంతో ఆ వ్యవసాయ క్షేత్రాన్ని జల్లెడపట్టారు. కొన్ని నిమిషాల్లో ఉంగరాన్ని కనుగొన్నారు. దాంతో ఎన్వీఎస్ఎస్ ప్రభాకర్ ముఖంలో ఆనందం కనిపించింది. రాచకొండ సీపీకి, వారి టెక్నికల్ టీమ్ కు కృతజ్ఞతలు తెలిపారు.
ఆ ఉంగరం ఎంతో శక్తిమంతమైనదని తాను నమ్ముతానని, స్వామీజీలు పూజ చేసి ఇచ్చిన ఉంగరం అని ఎన్వీఎస్ఎస్ ప్రభాకర్ వెల్లడించారు. ఆ ఉంగరం దొరకడం సంతోషదాయకమని అన్నారు.
