messi: ఫుట్ బాల్ ఉద్ధండులను బాలీవుడ్ దిగ్గజం కలిసిన వేళ.. వీడియో ఇదిగో!
- రొనాల్డో, మెస్సీ, ఎంబాపేలతో బిగ్ బీ కరచాలనం
- రియాద్ లో స్పెషల్ మ్యాచ్ ను ప్రారంభించిన అమితాబ్
- పీఎస్ జీ, రియాద్ సీజన్ మధ్య ఎగ్జిబిషన్ మ్యాచ్
ఫుట్ బాల్ లో ఉద్ధండులుగా పేరొందిన ఆటగాళ్లను బాలీవుడ్ దిగ్గజం బిగ్ బీ అమితాబ్ బచ్చన్ కలిసిన అరుదైన సందర్భం గురువారం చోటుచేసుకుంది. సౌదీ అరేబియాలో ఈ నెల 19న జరిగిన ఎగ్జిబిషన్ మ్యాచ్ లో రియాద్ సీజన్, పారిస్ సెయింట్ జెర్మెయిన్ (పీఎస్ జీ) తలపడ్డాయి. ఈ మ్యాచ్ కు బిగ్ బీ చీఫ్ గెస్ట్ గా హాజరయ్యారు. మ్యాచ్ ప్రారంభానికి ముందు ఇరుజట్ల ఆటగాళ్లతో అమితాబ్ బచ్చన్ కరచాలనం చేశారు. ఈ మ్యాచ్ లో రియాద్ సీజన్ తరఫున పోర్చుగల్ స్టార్ ఆటగాడు క్రిస్టియానో రొనాల్డో, పీఎస్ జీ తరఫున అర్జెంటీనా స్టార్ ప్లేయర్ లియోనెల్ మెస్సీ తలపడ్డారు. ఈ మ్యాచ్ లో 5-4 తేడాతో పారిస్ సెయింట్-జెర్మెయిన్ విజయం సాధించింది.
బ్రెజిల్ స్టార్ ఆటగాడు నెయ్ మార్, ఫ్రాన్స్ ఆటగాడు ఎంబాపె కూడా ఈ మ్యాచ్ లో తలపడ్డారు. అయితే, అర్జెంటీనాను విశ్వవిజేతగా నిలిపిన మెస్సీని కలిసినప్పుడు, పోర్చుగల్ స్టార్ రొనాల్డోను కలిసినప్పుడు అమితాబ్ కాస్త ఎక్కువసేపు షేక్ హ్యాండ్ ఇస్తూ కనిపించారు. ఫుట్‌బాల్ కు వీరాభిమాని అయిన అమితాబ్.. ఈ ప్రత్యేక సందర్భాన్ని తన ట్విట్టర్ అకౌంట్లోనూ షేర్ చేసుకున్నాడు. "రియాద్ లో ఓ సాయంత్రం.. ఇదో అద్భుతమైన సాయంత్రం.. క్రిస్టియానో రొనాల్డో, లియోనెల్ మెస్సీ, ఎంబాపె, నెయ్‌మార్ కలిసి ఆడటం, గెస్ట్ గా ఈ మ్యాచ్ ను ప్రారంభించడం.. పీఎస్‌జీ వర్సెస్ రియాద్ సీజన్స్ అద్భుతం" అని బిగ్ బీ ట్వీట్ చేశాడు.