Venkatesh Daggubati: తన 75వ చిత్రాన్ని ‘హిట్2’ దర్శకుడు శైలేష్ చేతిలో పెట్టిన విక్టరీ వెంకటేశ్
- నిర్మాతగా వెంకట్ బోయనపల్లి
- ప్రీ లుక్ పోస్టర్ విడుదల చేసిన నిహారిక ఎంటర్ టైన్ మెంట్
- ఈ నెల 25న అనౌన్స్ మెంట్ ఉంటుందని ప్రకటన
టాలీవుడ్ సీనియర్, విక్టరీ వెంకటేశ్ తన 75వ సినిమాపై సస్పెన్స్ కు తెరదించారు. ‘హిట్2’తో ప్రశంసలు అందుకున్న యువ దర్శకుడు శైలేష్ కొలనుతో ఆయన ఈ చిత్రాన్ని చేస్తున్నారు. నిహారిక ఎంటర్ టైన్ మెంట్ బ్యానర్ పై వెంకట్ బోయనపల్లి దీనిని నిర్మించనున్నారు. ఈ విషయాన్ని నిహారిక ఎంటర్ టైన్ మెంట్ సోమవారం వెల్లడించింది.
సినిమాకు సంబంధించిన ప్రీలుక్‌ పోస్టర్‌ను కూడా ఈ రోజు రిలీజ్‌ చేసింది. చొక్కామడిచి విస్పోటనానికి ఎదురు వెళ్తున్నట్టుగా ఉన్న వెంకీ బ్యాక్ షాట్ పోస్టర్ చూస్తే ఇది యాక్షన్ సినిమాలా కనిపిస్తోంది. ఈ నెల 25వ తేదీన సినిమా అనౌన్స్ మెంట్ ఉంటుందని చిత్ర బృందం ట్వీట్ చేసింది. ఆ రోజే ఇతర తారాగణం గురించి వెల్లడించే అవకాశం ఉంది. కాగా, వెంకీ చివరగా విష్వక్సేన్ హీరోగా నటించిన ‘ఓరి దేవుడా’ చిత్రంలో ప్రత్యేక పాత్రలో కనిపించారు.