Che Guevara: చేగువేరా కుమార్తె అలైదా గువేరాకు విజయవాడలో చేదు అనుభవం
- భారత్ లో పర్యటిస్తున్న చేగువేరా కుమార్తె, మనవరాలు
- నిన్న హైదరాబాదులో ఓ కార్యక్రమంలో పాల్గొన్న వైనం
- నేడు విజయవాడలో కార్యక్రమానికి హాజరు
- అలైదాకు చేగువేరా ఫొటో బహూకరణ
- బహూకరించిన కాసేపటికే చోరీకి గురైన ఫొటో
క్యూబా విప్లవవీరుడు, ప్రపంచంలోని చాలామందికి స్ఫూర్తిదాత చేగువేరా కుమార్తె అలైదా గువేరా, మనవరాలు ఎస్తెఫానియా గువేరా భారత్ లో పర్యటిస్తున్న సంగతి తెలిసిందే. హైదరాబాదు రవీంద్ర భారతిలో జరిగిన ఓ కార్యక్రమంలో వారు పాల్గొన్నారు. ఈ కార్యక్రమానికి ఒకట్రెండు రాజకీయ పార్టీలు మినహా, మిగిలిన అన్ని పార్టీల నేతలు హాజరై చేగువేరా కుమార్తెకు సంఘీభావం ప్రకటించారు.
కాగా, తెలంగాణ నుంచి ఏపీ వచ్చిన చేగువేరా కుమార్తె అలైదా గువేరాకు విజయవాడలో చేదు అనుభవం ఎదురైంది. విజయవాడలో జరిగిన ఓ కార్యక్రమంలో అలైదా గువేరాకు చేగువేరా ఫొటోను బహూకరించారు. అయితే, కాసేపటికే ఆ ఫొటో కనిపించకుండాపోయింది. అలైదా గువేరాకు బహూకరించిన వేదికపైనే చోరీకి గురైంది. దాంతో ఆమె తీవ్ర నిరాశకు లోనయ్యారు. ఆ ఫొటో దొరికితే తనకు పోస్టు ద్వారా పంపించాలంటూ ఆమె విజ్ఞప్తి చేశారు.