Ramcharan: ఈ క్షణాలు నాకు ఎప్పటికీ గుర్తుండిపోతాయి: రామ్ చరణ్
- అమెరికాలో 'ఆర్ఆర్ఆర్' చిత్ర ప్రదర్శన
- ప్రేక్షకులతో కలిసి సినిమా చూసిన రామ్ చరణ్
- అభిమానుల స్పందన ఎంతో సంతోషం కలిగించిందని వ్యాఖ్య
జూనియర్ ఎన్టీఆర్, రామ్ చరణ్, రాజమౌళి కాంబినేషన్లో వచ్చిన 'ఆర్ఆర్ఆర్' సినిమా ఎంతటి ఘన విజయాన్ని సాధించిందో అందరికీ తెలుసు. తెలుగు రాష్ట్రాల్లోనే కాకుండా దేశ వ్యాప్తంగా ఈ సినిమా సంచలన విజయాన్ని సాధించింది. బాక్సాఫీస్ ను ఈ చిత్రం షేక్ చేసింది. పలు దేశాల్లో కూడా ఈ సినిమా ప్రేక్షకాదరణ పొందింది. ఇప్పటికే వివిధ కేటగిరీల్లో ఈ సినిమా ఎన్నో అంతర్జాతీయ అవార్డులను సొంతం చేసుకుంది. ఆస్కార్ అవార్డుల బరిలో కూడా ఈ సినిమా ఉంది. ఈ నేపథ్యంలో ఈ చిత్ర యూనిట్ అమెరికాలోనే ఉంది.
తాజాగా అమెరికాలో ఈ చిత్రాన్ని ప్రదర్శించారు. ఏస్ హోటల్ లో ప్రదర్శించిన ఈ సినిమాను చూసేందుకు అభిమానులు పోటెత్తారు. ప్రేక్షకులతో కలిసి రామ్ చరణ్ కూడా సినిమాను వీక్షించారు. ఈ విషయాన్ని చరణ్ ట్విట్టర్ ద్వారా తెలిపారు. అభిమానుల నుంచి వచ్చిన అమోఘమైన స్పందన.. స్టాండింగ్ ఒవేషన్ ను చూసి చాలా సంతోషం కలిగిందని చరణ్ చెప్పాడు. ఈ క్షణాలు తనకు ఎప్పుడూ గుర్తుంటాయని తెలిపారు.
