SRH: చెపాక్ లో సన్ రైజర్స్ ఘోర పరాజయం
- సొంతగడ్డపై చెన్నై సూపర్ కింగ్స్ ఆధిపత్యం
- 7 వికెట్ల తేడాతో సన్ రైజర్స్ పై గెలుపు
- మొదట బ్యాటింగ్ చేసిన సన్ రైజర్స్
- 20 ఓవర్లలో 7 వికెట్లకు 134 పరుగులు
- 18.4 ఓవర్లలో ఛేదించిన సూపర్ కింగ్స్
- 77 పరుగులతో నాటౌట్ గా నిలిచిన కాన్వే
చెన్నై సూపర్ కింగ్స్ సొంతగడ్డపై ఆల్ రౌండ్ షో కనబర్చిన వేళ, సన్ రైజర్స్ హైదరాబాద్ జట్టు ఘోర పరాజయం చవిచూసింది. చెన్నైలోని చెపాక్ స్టేడియంలో జరిగిన మ్యాచ్ లో సన్ రైజర్స్ 7 వికెట్ల తేడాతో ఓటమిపాలైంది.
ఈ మ్యాచ్ లో టాస్ ఓడి బ్యాటింగ్ చేసిన సన్ రైజర్స్ 20 ఓవర్లలో 7 వికెట్లకు 134 పరుగులు చేయగా... లక్ష్యఛేదనలో చెన్నై సూపర్ కింగ్స్ 18.4 ఓవర్లలో 3 వికెట్లకు 138 పరుగులు చేసింది. ఓపెనర్ డెవాన్ కాన్వే 57 బంతుల్లో 77 పరుగులు చేసి సూపర్ కింగ్స్ విజయంలో కీలకపాత్ర పోషించాడు. అతడి స్కోరులో 12 ఫోర్లు, 1 సిక్స్ ఉన్నాయి.
మరో ఓపెనర్ రుతురాజ్ గైక్వాడ్ 35 పరుగులు చేశాడు. సన్ రైజర్స్ బౌలర్లలో మయాంక్ మార్కండే 2 వికెట్లు తీశాడు.
ఈ విజయంతో చెన్నై సూపర్ కింగ్స్ పాయింట్ల పట్టికలో మూడో స్థానానికి ఎగబాకింది. చెన్నై ఇప్పటివరకు 6 మ్యాచ్ లు ఆడి 4 విజయాలు నమోదు చేసింది. అదే సమయంలో, సన్ రైజర్స్ 6 మ్యాచ్ లు ఆడి రెండు విజయాలు సాధించింది.