Jharkhand: ఒకే కాన్పులో ఐదుగురు శిశువుల జననం!
- ఝార్ఖండ్‌లోని రిమ్స్ ఆసుపత్రిలో ఘటన
- శిశువులు తక్కువ బరువుతో పుట్టడంతో ఎన్ఐసీయూలో ఉంచి చికిత్స
- తల్లీబిడ్డలు క్షేమంగానే ఉన్నారన్న వైద్యులు
ఝార్ఖండ్‌ రాజధాని రాంచీ నగరంలోగల రిమ్స్ ఆసుపత్రిలో తాజాగా ఓ అరుదైన ఘటన చోటుచేసుకుంది. ఓ మహిళ ఒకే కాన్పులో ఐదుగురు శిశువులకు జన్మనిచ్చింది. అయితే, శిశువులు తక్కువ బరువు ఉండటంతో వారిని ఎన్ఐసీయూలో ఉంచి చికిత్స అందిస్తున్నారు. శిశువులు ఆరోగ్యంగానే ఉన్నారని, వారిని నిశితంగా పరిశీలించేందుకు ఎన్ఐసీయూలో పెట్టామని వైద్యులు తెలిపారు. ఈ మేరకు ట్వీట్టర్‌లో వెల్లడించారు. ‘‘ఛాటర్‌కు చెందిన ఓ మహిళ ఐదుగురు పిల్లలకు జన్మనిచ్చింది. శిశువులను ఎన్ఐసీయూలో ఉంచి పర్యవేక్షిస్తున్నాం’’ అని రిమ్స్ వైద్యులు తెలిపారు.
