Air India: టేకాఫ్ చేసిన గంటకే తిరిగొచ్చిన విమానం.. విశాఖ విమానాశ్రయంలో ఘటన
- ఆదివారం 5.30కు ఢిల్లీకి బయలుదేరిన ఎయిర్ ఇండియా విమానం
- సాంకేతిక సమస్య తలెత్తడంతో మరో గంటకే విమానాశ్రయానికి తిరిగొచ్చిన వైనం
- ఆ సమయంలో విమానంలో ప్రయాణిస్తున్న జాతీయ ఎస్టీ కమిషన్ సభ్యులు
- రాత్రి 9.30కు ఎస్టీ కమిషన్ సభ్యులను మరో విమానంలో ఢిల్లీకి తరలింపు
- ఇతరులకు భోజనం, వసతి ఏర్పాట్లు చేసిన ఎయిర్ ఇండియా
విశాఖపట్నం నుంచి ఆదివారం సాయంత్రం బయలుదేరిన ఓ ఎయిర్ ఇండియా విమానం గంటకే తిరిగొచ్చేసింది. విమానంలో సాంకేతిక లోపం తలెత్తడంతో విమానాన్ని వెనక్కు మళ్లించాల్సి వచ్చింది. దీంతో, సాయంత్రం 5.30కు బయలుదేరిన విమానం ఆరున్నర కల్లా విమానాశ్రయానికి తిరిగొచ్చేసింది. ఆ సమయంలో విమానంలో జాతీయ ఎస్టీ కమిషన్ సభ్యులు అనంత్‌నాయక్‌, మరో ముగ్గురు సభ్యులు ప్రయాణిస్తున్నారు. కాగా, రాత్రి తొమ్మిదిన్నరకు వారిని ఎయిర్‌ఇండియా మరో విమానంలో ఢిల్లీకి పంపించింది. మిగిలిన 165 మంది ప్రయాణికులకు వసతి, భోజనం ఏర్పాట్లు చేసింది.