Anil Kumar Yadav: చంద్రబాబు మరిన్ని కేసులు ఎదుర్కోబోతున్నారు: అనిల్ కుమార్ యాదవ్
- స్కిల్ డెవలప్ మెంట్ లో చంద్రబాబు అవినీతికి పాల్పడినట్టు ఆధారాలు ఉన్నాయన్న అనిల్
- ఆధారాలు ఉండటం వల్లే కోర్టులు బెయిల్ ఇవ్వడం లేదని వ్యాఖ్య
- వైసీపీ నుంచి వెళ్లిన ఎమ్మెల్యేలు లేనిపోని హడావుడి చేస్తున్నారని మండిపాటు
టీడీపీ అధినేత చంద్రబాబు చేసిన కుంభకోణాలు ఒక్కొక్కటిగా బయటకు వస్తున్నాయని వైసీపీ ఎమ్మెల్యే, మాజీ మంత్రి అనిల్ కుమార్ యాదవ్ అన్నారు. స్కిల్ డెవలప్ మెంట్ లో చంద్రబాబు అవినీతికి పాల్పడినట్టు పక్కా ఆధారాలు ఉన్నాయని... అన్ని ఆధారాలతోనే చంద్రబాబును సీఐడీ అరెస్ట్ చేసిందని చెప్పారు. ఆధారాలు ఉండటం వల్లే ఆయనకు కోర్టులు బెయిల్ ఇవ్వడం లేదని అన్నారు. ఏ వయసులో తప్పు చేసినా నేరం నేరమేనని చెప్పారు. భవిష్యత్తులో చంద్రబాబు మరిన్ని కేసులు ఎదుర్కోబోతున్నారని తెలిపారు.
