Himanta Sarma: హమాస్ తో కలిసి పోరాడేందుకు పవార్ తన కూతురును పంపిస్తాడేమో!: అసోం ముఖ్యమంత్రి వ్యంగ్యం
- ఇజ్రాయెల్ కు ప్రధాని మోదీ మద్దతు పలకడాన్ని తప్పుబట్టిన పవార్
- మిలిటెంట్లకు మద్దతుగా నిలబడాలా అంటూ ప్రశ్నించిన హిమంత బిశ్వ శర్మ
- టెర్రరిస్టులకు అనుకూలంగా మాట్లాడతారని ఊహించలేదన్న పీయూష్ గోయెల్
గాజాలోని హమాస్ మిలిటెంట్లపై ఇజ్రాయెల్ యుద్ధం ప్రకటించిన విషయం తెలిసిందే.. ఇరువర్గాల మధ్య పోరు భీకరంగా కొనసాగుతోంది. రాకెట్ దాడులతో అటు గాజాలో, ఇటు ఇజ్రాయెల్ లోనూ ప్రాణ, ఆస్తి నష్టం జరుగుతోంది. ఈ యుద్ధంలో ముస్లిం దేశాలు పాలస్తీనాకు మద్దతు తెలపగా.. భారత్ సహా చాలా దేశాలు ఇజ్రాయెల్ వైపు నిలబడ్డాయి. ఈ క్రమంలోనే భారత ప్రధాని నరేంద్ర మోదీ ఇటీవల ఇజ్రాయెల్ కు అనుకూలంగా మాట్లాడారు. మిలిటెంట్లపై పోరులో ఇజ్రాయెల్ కు మద్దతు తెలిపారు. ఈ వ్యాఖ్యలను నేషనలిస్ట్ కాంగ్రెస్ పార్టీ (ఎన్సీపీ) చీఫ్ శరద్ పవార్ తప్పుబట్టారు. పాలస్తీనాకు అనుకూలంగా ఆయన మాట్లాడారు. దీంతో ఆయన వ్యాఖ్యలపై దుమారం రేగుతోంది.
ఈ వ్యాఖ్యలపై అసోం ముఖ్యమంత్రి హిమంత బిశ్వ శర్మ తీవ్రంగా స్పందించారు. హమాస్ మిలిటెంట్లకు మద్దతుగా పవార్ తన కూతురును పంపిస్తాడేమో అంటూ వివాదాస్పద వ్యాఖ్యలు చేశారు. కేంద్రమంత్రి పీయూష్ గోయెల్ స్పందిస్తూ.. ప్రపంచంలో టెర్రరిజం ఏ రూపంలో ఉన్నా ఖండించాల్సిందేనని స్పష్టం చేశారు. ఓ సీనియర్ పొలిటికల్ లీడర్ అయిన శరద్ పవార్.. టెర్రరిస్టులకు అనుకూలంగా మాట్లాడతారని ఊహించలేదని చెప్పారు. దేశానికి రక్షణ మంత్రిగా, ఓ రాష్ట్రానికి పలుమార్లు ముఖ్యమంత్రిగా చేసిన నేత ఇలా మిలిటెంట్లకు అనుకూలంగా మాట్లాడటమేంటని ప్రశ్నిస్తూ గోయెల్ ట్వీట్ చేశారు.
