SBI ATM: గ్యాస్ కట్టర్‌తో ఏటీఎంను తెరిచి.. లక్షల రూపాయలతో ఉడాయించారు!
- ఉత్తరాఖండ్‌లోని రూర్కీలో ఘటన
- చోరీలో పాల్గొన్న నలుగురు దుండగులు
- డబ్బు సంచులతో స్కార్పియో వాహనంలో పరారీ
గ్యాస్ కట్టర్‌తో ఎస్‌బీఐ ఏటీఎంను బద్దలుగొట్టిన నలుగురు దుండగులు లక్షల రూపాయల డబ్బుతో పరారయ్యారు. ఉత్తరాఖండ్‌లోని రూర్కీలో నిన్న పొద్దుపోయాక జరిగిందీ ఘటన. ధండేరా ప్రాంతంలో జరిగిన ఈ ఘటనకు సంబంధించిన దృశ్యాలు అక్కడి సీసీటీవీ కెమెరాలో రికార్డయ్యాయి.
సోషల్ మీడియాలో వైరల్ అవుతున్న వీడియో ప్రకారం.. మొత్తం నలుగురు దొంగలు ఈ చోరీలో పాలుపంచుకున్నారు. తమను ఎవరూ గుర్తుపట్టకుండా ఒంటికి దుప్పట్లు చుట్టుకున్న ముగ్గురు దుండగులు ఏటీఎం నుంచి నగదు ఉన్న సంచులతో బయటకు రావడం స్పష్టంగా కనిపిస్తోంది. బయట ఉన్న పార్క్ చేసిన తెల్లని స్కార్పియో వాహనంలోని డిక్కీలో ఆ డబ్బు సంచులు పడేసి అందరూ కారెక్కి పరారయ్యారు.
ఈ ఘటనపై కేసు నమోదు చేసుకున్న పోలీసులు ఏటీఎంకు చేరుకుని పరిశీలించారు. దొంగల కోసం ఆ ప్రాంతంలో గాలించారు. నిందితులు గ్యాస్ కట్టర్‌తో ఏటీఎంను కట్ చేయడం వల్ల లోపల ఉన్న నగదు కొంత కాలిపోయినట్టు పోలీసులు తెలిపారు. కాలిపోయిన డబ్బులు వదిలి మిగతా సొత్తుతో వారు పరారైనట్టు పేర్కొన్నారు. నిందితుల కోసం గాలిస్తున్నట్టు పేర్కొన్నారు.