Hyderabad: హైదరాబాద్‌లో నడిరోడ్డుపై ఆర్టీసీ బస్సులో ప్రీ-వెడ్డింగ్ షూట్... ఇదిగో వీడియో
- నెట్టింట వైరల్‌గా మారిన ప్రీ-వెడ్డింగ్ షూట్ వీడియో
- ట్రాఫిక్‌లో ఆగి ఉన్న బస్సులో నుంచి దిగుతూ షూట్
- ఆగ్రహం వ్యక్తం చేస్తున్న నెటిజన్లు
ఇప్పుడు పెళ్లంటే చాలు... ప్రీవెడ్డింగ్ షూట్ కోసం ఎగబడుతున్నారు. ఇలా ముహూర్తం పెట్టుకోవడమే ఆలస్యం... అలా ప్రీ-వెడ్డింగ్ షూట్ కోసం జంటలు రెడీ అవుతున్నాయి. తమకు నచ్చిన ప్రాంతాలకు వెళ్లి షూట్ చేయించుకొని... పెళ్లిలో ఈ ప్రీ-వెడ్డింగ్ షూట్ వీడియోను ప్రదర్శిస్తున్నారు. జంటలు తమ తమ అభిరుచులకు అనుగుణంగా ప్రాంతాలను ఎంచుకుంటే... ఫోటోగ్రాఫర్ తన క్రియేటివిటికి పదును పెట్టి వీడియోను సిద్ధం చేస్తున్నాడు.
ఈ క్రమంలో హైదరాబాద్‌లో ఓ జంట ఏకంగా ఆర్టీసీ బస్సులో ప్రీ-వెడ్డింగ్ షూట్ జరుపుకుంది. ట్రాఫిక్‌లో ఓ బస్సు ఆగి ఉన్న సమయంలో ఓ జంట ప్రీ-వెడ్డింగ్ షూట్ జరుపుకుంది. ఇందుకు సంబంధించిన వీడియో నెట్టింట వైరల్‌గా మారింది. యువతి బస్సులో నుంచి దిగుతున్నట్లుగా.. అబ్బాయి వెనుక నుంచి వస్తున్నట్లుగా వీడియో ఉంది. ఆ తర్వాత రోడ్లపై కూడా షూట్ చేశారు. ఈ వీడియోపై చాలామంది నెటిజన్లు ఆగ్రహం వ్యక్తం చేస్తున్నారు. టీఎస్ఆర్టీసీని ట్యాగ్ చేసి వారిపై చర్యలు తీసుకోవాలని డిమాండ్ చేస్తున్నారు. ట్రాఫిక్‌లో నడిరోడ్డుపై నిలిచిన బస్సు వద్ద షూటింగ్ చేయడాన్ని చాలామంది తప్పుబడుతున్నారు.