Lavu Sri Krishna Devarayalu: టీడీపీ నేత కన్నా లక్ష్మీనారాయణతో ఎంపీ లావు శ్రీకృష్ణదేవరాయలు భేటీ
- ఆసక్తికరంగా ఉమ్మడి గుంటూరు జిల్లా రాజకీయాలు
- నరసరావుపేట ఎంపీ స్థానం వైసీపీ ఇన్చార్జిగా అనిల్ కుమార్
- ఎంపీ లావు శ్రీకృష్ణదేవరాయలు త్వరలో టీడీపీలో చేరతారంటూ ప్రచారం
- ఇటీవల చంద్రబాబును కలిసిన నరసరావుపేట సిట్టింగ్ ఎంపీ
ఏపీలో వైసీపీ అసంతృప్త నేతలు టీడీపీ లేదా జనసేన వైపు చూస్తున్నారు. ఈసారి ఎన్నికల్లో పలువురు వైసీపీ సిట్టింగ్ ఎమ్మెల్యేలు, ఎంపీలకు టికెట్ నిరాకరించడం లేదా నియోజకవర్గ మార్పు చేస్తున్నారు. ఈ క్రమంలో నరసరావుపేట ఎంపీ శ్రీకృష్ణదేవరాయలు స్థానం కూడా గల్లంతైంది.
నెల్లూరు సిటీ ఎమ్మెల్యే, మాజీ మంత్రి అనిల్ కుమార్ యాదవ్ ను తీసుకొచ్చి నరసరావుపేట ఎంపీ స్థానం ఇన్చార్జిగా నియమించారు. ఈ నేపథ్యంలో, ఎంపీ లావు శ్రీకృష్ణదేవరాయలు నేడు టీడీపీ నేత కన్నా లక్ష్మీనారాయణను కలిశారు. శ్రీకృష్ణదేవరాయలు టీడీపీలో చేరతారన్న వార్తల నేపథ్యంలో ఈ భేటీ ప్రాధాన్యత సంతరించుకుంది.
ఎంపీతో పాటు వైసీపీ రెబెల్ ఎమ్మెల్సీ జంగా కృష్ణమూర్తి, ఎన్నారై వైద్య నిపుణుడు డాక్టర్ పెమ్మసాని చంద్రశేఖర్ కూడా ఈ భేటీలో పాల్గొన్నారు. ఈ సమావేశంలో గుంటూరు రాజకీయాలు చర్చకు వచ్చినట్టు తెలుస్తోంది. లావు శ్రీకృష్ణదేవరాయలు ఇప్పటికే టీడీపీ అధినేత చంద్రబాబును కూడా కలిశారు.