Razakar: రజాకార్ విడుదల ఆపాలంటూ తెలంగాణ హైకోర్టులో పిటిషన్
- ఈ నెల 15న విడుదల కానున్న 'రజాకార్' చిత్రం
- 6 భాషల్లో విడుదలవుతున్న సినిమా
- విడుదలను ఆపేయాలని కోరుతూ ఏపీసీఆర్ పిటిషన్
నిజాం పాలన సమయంలో, దేశానికి స్వాతంత్య్రం వచ్చిన తర్వాత కూడా తెలంగాణలో హిందూ జనాభాపై రజాకార్లు చేసిన అకృత్యాలు అంతాఇంతా కాదు. రజాకార్ల ఆగడాలు, తెలంగాణ బిడ్డల బాధలు, త్యాగాలు, ఈ గడ్డ కోసం పోరాడిన వాళ్ల చరిత్ర ఆధారంగా 'రజాకార్: ది సైలెంట్ జెనోసైడ్ ఆఫ్ హైదరాబాద్' చిత్రాన్ని తెరకెక్కించారు. ఈ చిత్రంలో బాబీ సింహా, వేదిక, అనుష్య త్రిపాఠి, ప్రేమ, ఇంద్రజ, అనసూయ మకరంద్ దేశ్ పాండే తదితరులు నటించారు. యాటా సత్యనారాయణ దర్శకత్వం వహించిన ఈ చిత్రాన్ని గూడురు నారాయణరెడ్డి నిర్మించారు. ఈ నెల 15న తెలుగు, తమిళం, కన్నడ, మలయాళం, హిందీ, మరాఠీ భాషల్లో విడుదల కాబోతోంది.
మరోవైపు ఈ చిత్రం విడుదలను నిలిపివేయాలంటూ తెలంగాణ హైకోర్టులో పిటిషన్ దాఖలయింది. అసోసియేషన్ ఫర్ ప్రొటెక్షన్ ఆఫ్ సివిల్ రైట్స్ (ఏపీసీఆర్) ఈ పిటిషన్ వేసింది. ఈ నెల 11న ఈ పిటిషన్ పై విచారణ జరగనుంది. ఈ సందర్భంగా ఏపీసీఆర్ కార్యదర్శి నదీమ్ ఖాన్ మాట్లాడుతూ... పౌర హక్కులను పరిరక్షించడానికి, మత సామరస్యాన్ని ప్రోత్సహించడానికే తాము పిటిషన్ వేశామని చెప్పారు. మరోవైపు దర్శక నిర్మాతలు మాట్లాడుతూ, రజాకార్ల అరాచకాలు, ఈ గడ్డ కోసం పోరాడిన వారి చరిత్ర చెప్పడానికే ఈ సినిమా తీశామని తెలిపారు.
