TSRTC: టీఎస్ఆర్‌టీసీ బ‌స్సుల స‌మాచారం తెలిపే 'గ‌మ్యం' యాప్
- ప్ర‌స్తుతం ఎయిర్‌పోర్టుకు వెళ్లే ఎల‌క్ట్రిక్ బ‌స్సుల‌కు మాత్ర‌మే అందుబాటులో ఉన్న యాప్
- మొద‌ట దూర‌ప్రాంతాల‌కు వెళ్లే ఎక్స్‌ప్రెస్, సూప‌ర్ ల‌గ్జ‌రీ, ఏసీ బ‌స్సుల‌కు గ‌మ్యం యాప్ అనుసంధానం
- ఈ ఏడాది మొత్తం 1,100 కొత్త బ‌స్సులు తీసుకువ‌స్తున్న టీఎస్ఆర్‌టీసీ
- అన్నింటిలోనూ అందుబాటులో గ‌మ్యం యాప్
మ‌నం ప్ర‌యాణించాల్సిన బ‌స్సు స‌మాచారం తెలిపే గ‌మ్యం యాప్‌ను టీఎస్ఆర్‌టీసీ ఏడాది క్రితం అందుబాటులోకి తెచ్చిన విష‌యం తెలిసిందే. కానీ, ఈ యాప్ కేవ‌లం ఎయిర్‌పోర్టుకు వెళ్లే ఎల‌క్ట్రిక్ బ‌స్సుల‌కు మాత్ర‌మే ప‌రిమిత‌మైంది. మిగ‌తా వాటిలో దీని జాడ లేదు. మొద‌ట దూర‌ప్రాంతాల‌కు వెళ్లే ఎక్స్‌ప్రెస్, సూప‌ర్ ల‌గ్జ‌ర, ఏసీ బ‌స్సుల‌కు గ‌మ్యం యాప్ ను అనుసంధానించారు. ఆ త‌ర్వాత న‌గ‌రంలో తిరిగే అన్ని బ‌స్సుల‌కు అమ‌ర్చాల‌ని ప్ర‌య‌త్నించారు.
ఇక కొత్త బ‌స్సులు స‌మ‌కూరితే వాటిలో వెహిక‌ల్ ట్రాకింగ్ సిస్ట‌మ్ (వీటీఎస్‌) అర్చాల‌ని నిర్ణ‌యించారు. మొత్తం 500 ఎల‌క్ట్రిక్ బ‌స్సులు ఆగ‌స్టు నాటికి రానున్నాయి. పాత మెట్రో ఎక్స్‌ప్రెస్‌ల స్థానంలో వీటిని తీసుకువ‌స్తున్న‌ట్లు టీఎస్ఆర్‌టీసీ అధికారులు చెబుతున్నారు. దీనిలో భాగంగా మంగ‌ళ‌వారం ప్రారంభించిన 22 బ‌స్సుల్లో గ‌మ్యం యాప్‌ను అనుసంధానం చేశారు.
ఓవైపు అద్దెకు ఎల‌క్ట్రిక్ బ‌స్సులు తీసుకుంటుండగానే టీఎస్ఆర్‌టీసీ సొంతంగా 565 డీజిల్ బ‌స్సులు స‌మ‌కూర్చుకుంటోంది. ఈ సంవ‌త్స‌రం మొత్తం 1,100 కొత్త బ‌స్సులు రానున్నాయి. వీటి అన్నింటిలోనూ గ‌మ్యం యాప్ అందుబాటులో ఉంటుంది. ఇలా బ‌స్సుల‌కు ఈ యాప్‌ను అనుసంధానం చేసి ప్ర‌యాణికుల‌కు బ‌స్సుల జాడ తెలిసేలా చ‌ర్య‌లు తీసుకోవ‌డం జ‌రుగుతుంద‌ని టీఎస్ఆర్‌టీసీ అధికారులు చెప్పుకొచ్చారు.